Çmimi privat i vaksinës kundër gripit sezonal nga viti i kaluar është shtrenjtuar për 150 denar, 40 mijë doza do të jenë falas
Javën e ardhëshme pritet që në vend të arrijnë vaksinat kundër gripit sezonal, ndërsa çmimi privat është 800 denarë, 150 denarë më i shtrenjtë se vitin e kaluar, njofton Portalb.mk.
“Rritja e çmimit të vaksinës, ndryshe nga viti i kaluar, është për faktin se tani çmimi i blerjes së vaksinës është 650 denarë, kurse 160 denarë janë harxhime manipulative (material i harxhuar). Sipas rekomandimeve të Komitetit për Imunizim, afati kohor për vaksinimin është fillimi i nëntorit. Menjëherë pas mbërritjes së vaksinave, do të fillojë edhe caktimi i termineve,” thonë nga Ministria e Shëndetësisë për Sdk.mk.
Ata shtojnë se vaksinat janë produkt i “Sanofi Pasteur” nga Franca, gjithsej janë 40,000 doza të katër llojeve të vaksinave, të cilat janë të destinuara për vaksinimin falas të grupeve të rrezikut të përcaktuara si në vijim:
- Të moshuarit (mbi 65 vjet)
- Personat me sëmundje kronike
- Punonjësit e shëndetësisë
- Gratë shtatzëna
- Fëmijët e moshës nga 6 muaj deri në 5 vjeç
Imunizimi sezonal kundër gripit në Qendrën Shëndetësore Shkup do të bëhet në 6 poliklinika në territorin e Shkupit, edhe atë si vijon:
- Poliklinika Gjorçe Petrov
- Poliklinika Bukuresht
- Poliklinika Çair
- Poliklinika Bit Pazar
- Poliklinika Çento
- Poliklinika Jane Sandanski
Imunizimi, thonë nga Ministria e Shëndetësisë, do të bëhet me rekomandim të mjekut amë, përmes Termini im në periudhën nga ora 14:00 deri në 19:00. Vaksinat komerciale të gripit sezonal sigurohen nga Qendrat për Shëndet Publik, ku do të bëhet edhe vaksinimi. Ndërkohë QShP Shkup ka siguruar 4,000 vaksina, thanë nga Ministria.
