Venezuelë, trazirat në burg shkaktojnë 46 të vdekur dhe 60 të plagosur

Të paktën 46 të burgosur kanë humbur jetën dhe 60 të tjerë janë plagosur në një burg në Venezuelë gjatë një trazire, teksa të dënuarit tentuan të arratiseshin. Ngjarja u shënua në burgun Llanos në Guanare.

Të burgosurit mbetën të plagosur gjatë përleshjeve me forcat e Gardës Kombëtare Bolivariane.

Raportohet se të burgosurit përdorën armë të ndryshme. Ndërsa disa të dënuar që u përpoqën të dilnin jashtë u neutralizuan nga forcat e sigurisë, transmeton Vizion Plus.

Ministri i burgjeve në Venezuelë, Iris Varela konfirmoi se gjatë incidentit mbeti i plagosur edhe drejtori i burgut, Carlos Toro, por nuk dha më shumë detaje.

Ligjvënësja Maria Martinez tha se trazirat rezultuan nga autoritetet e burgut që ndalonin të afërmit e të burgosurve t’u sillnin ushqim, siç është zakon në burgjet e Venezuelës.