Timmermans – Zaev: BE-ja duhet t’i fillojë negociatat me RMV-në
“Bashkimi Evropian (BE) tani duhet të ndërmarrë hapin vendimtar dhe të marrë vendimin për fillimin e negociatave për aderimin e Republikës së Maqedonisë së Veriut (RMV)”. Ky është qëndrimi i përbashkët i nënkryetarit të Komisionit Evropian (KE), France Timmermans dhe kryeministrit të RMV-së, Zoran Zaev në takimin që u zhvillua sot në Bruksel, transmeton Portalb.mk.
Siç njoftojnë nga Kabineti i Zaevit, në takim është vlerësuar se nisja e negociatave të BE-së me RMV-në, do të jetë mesazh i fortë edhe për vendet e Ballkanit.
“Ky do të jetë një mesazh i fortë për vendet e tjera të rajonit që marrjen e vendimeve të vështira dhe të përgjegjshme si dhe proceset e thella të reformës është një investim për një të ardhme më të mirë”, thuhet në kumtesën e Kabinetit të Zaevit.
Ndërkaq Zaevi ka deklaruar se, “çdo vonesë në fillimin e negociatave do të hap hapësirë për ndikimin e palëve të treta, për të cilat vlerat demokratike nuk janë përparësi”.
Zaevi në takim ka qenë i shoqëruar edhe nga zëvendëskryeministri për Çështje Evropiane, Bujar Osmani, ministri i Punëve të Jashtme, Nikolla Dimitrov dhe këshilltari, Bojan Mariçiq.
Ky takim vjen në vazhdën e Samitit të liderëve të Bashkimit Evropian (BE), që mbahet sot dhe nesër. Sot do të diskutohet për çështjen e “Brexit”-it dhe operacioni turk në Siri, ndërkaq nesër, dhënia e datës për nisjen e negociatave të BE-së me RMV-në dhe Shqipërinë.
- LEXO: Pendarovski: Janë duke u bërë përpjekjet e fundit rreth formulimeve që përdoren nga Këshilli
- LEXO: Data e BE-së, Merkel: Shanset nuk janë shumë të mira
- LEXO: Raportuesja e Kosovës në PE: Emanuel Makron, zgjohu dhe jep përgjegjësi ndaj RMV-së dhe Shqipërisë
- LEXO: Ciprasi Junkerit: Dhënia e datë për RMV-në, është çështje e kredibilitetit të BE-së