SKANDALOZE: Betimi i ri i xhandarmërisë serbe, fton në luftë (video)
Mediat kosovare shkruajnë se me ndryshimin e formulës qeverisëse në Serbi ndryshimi më i madh pritet të ndodhë në sektorin e sigurisë.
Kryeministri i ri i qeverisë serbe, Ivica Dacic, do të vazhdojë të jetë edhe Ministër i Punëve të Brendshme, duke pasur nën kontroll Policinë dhe Xhandarmërinë, ndërsa tani do ta marrë nën kontroll edhe Shërbimin Sekret Serb (BIA). Ky sektor deri tani ishte nën kontrollin e Tadic. BIA tani i përgjigjet drejtpërdrejt Kryeministrit të Serbisë.
Në këtë mënyrë, i tërë aparati shtetëror i sigurisë do të jetë edhe njëherë nën kontroll të SPS. ‘Në këtë kontekst, nuk është i rastësishëm edhe vendimi nga Dacic që të ndryshohet teksti i betimit të Xhandarmërisë serbe, ku lufta për kthimin e Kosovës vendoset në qendër të betimit. Vendimi për ndryshim të tekstit erdhi në të njëjtën ditë kur Dacic deklaroi se do të angazhohet për kthimin e policisë serbe në Kosovë’, shrkuan e përditshjma kosovare Express.
Xhandarmëria serbe është një forcë prej 3 000 xhandarësh, 600 prej të cilëve janë formacione elite të cilat për nga organizimi dhe detyrat i ngjajnë më shumë një force ushtarake sesa policore. Xhandarmëria i përgjigjet drejtpërdrejt Ministrit të Punëve të Brendshme.
Ndërsa Ministria e Mbrojtjes, që deri tani ishte nën kontrollin e Tadic, do të kalojë nën kontrollin e SNS të Nikolic, ku kandidat për Ministër përmendet Borislav Pelevic, ish- zëvendës komandanti i njësive paramilitare të Arkanit.
Betim i ri i xhandarmërisë serbe: Pa Kosovën nuk ekzistoj as unë…
Pjesëtarët e Xhandarmërisë, njësisë speciale të Ministrisë së Brendshme të Serbisë, kanë bërë dje një betim të ri. Pjesa më e madhe e tekstit i është kushtuar Kosovës, pa të cilën, siç thuhet, “nuk ekziston as populli serb dhe Serbia”.
Sipas B92, Xhandarmëria serbe ka kryer një betim të ri, e cila është prezantuar dje, kurse autor i tekstit është Bratisllav Dikic, njeriu i parë i Xhandarmërisë.
Në Xhandarmëri kanë pohuar se njësia e MPB-së sivjet kremton Vidovdanin si kremte të saj, dhe kjo është arsyeja që Kosova gjendet në fokus të betimit dhe se kjo nuk është ndonjë gjë e re.
“Bëhet fjalë thjesht për metaforë. Kemi dashur që në frymën e Vidovdanit të kthehemi në histori dhe t’i kujtojmë trimat e vjetër të Kosovës dhe në përgjithësi, atë ditë si ditën e trimave kosovarë dhe në bazë të kësaj kemi thënë se do të fitojmë apo vdesim”, tha zëdhënësja e Xhandarmërisë, Stanica Puzovic.
Ajo theksoi se betimi dhe simbolika e ndërlidhjes së Ksovës nuk kanë kurrfarë lidhje me ndërrimin e pushtetit në Serbi.
“Kosova ka qenë gjithnjë e rëndësishme për këtë njësi, që nga formimi i saj deri sot”, shtoi ajo.
Pjesëtarët e Xhandarmërisë dje kanë shënuar 152 vjetorin e formimit. Xhandarmëria ka në përbërje të saj Komandën, e cila është e vendosur në Beograd, dhe katër njësi – në Beograd, Nish, Kralevë dhe Novi Sad. Këto njësi kanë territorin e vet të përgjegjësisë, por sipas nevojës mund të angazhohen në territorin e mbarë Serbisë.
Betimi i Xhandarmërisë:
Pa Kosovën nuk ekziston as populli im serb
Pa Kosovën nuk ekziston Serbia ime
Pa Kosovën nuk ekzistoj as unë
Popull serb, vëllezër e motra
Betohem para Zotit
Do të fitoj me nder apo do të vdes
Për nderim tim
Për origjinën time
Për familjen time
Për Serbinë time…