VV pranon se mes aktivistëve ka pasur ngacmime seksuale

Drejtuesja e Sekretariatit të Gruas Aktiviste në Vetëvendosje, Nazlie Bala, ka pranuar se në këtë parti ka pasur ngacmime seksuale, por ato ishin të fshehura, transmeton Koha.net.

Një debat lidhur me ngacmimet seksuale është ngjallur orëve të fundit mes të pakënaqurve nga Vetëvendosje, ndërsa tani Bala ka pranuar se një problem i tillë ishte i pranishëm tek anëtarët e partisë, por ka shtuar se kjo ishte e pranishme në numër të vogël.

“Në shoqëritë patriarkale, ku bëjmë pjesë edhe ne, ekziston një kulture sipas së cilës vajza e gruaja nëse thotë ‘po’ akuzohet si e pamoralshme, e nëse thotë ‘jo’akuzohet si konservatore dhe e prapambetur. Kjo është shume ofenduese, sepse vajzat e gratë, të paktën brenda një Lëvizje emancipuese, duhet të shihen si të zonjat e vetes, jo si pronë e dikujt. Ka pasur ngacmime, kjo nuk ka qene kulture e përgjithshme as e pranueshme, por ka ndodhur fshehur, prej një numri të vogël personash. Këto ngacmime i kemi marre vesh nga ankesat e vajzave të përfshira drejtpërdrejt”, ka shkruar ajo në Facebook.

Sipas Balës, ngacmimet nuk ishin të drejtpërdrejta në shumicë, por ishin paragjykuese apo mospranim të refuzimit. “Nëse një vajzë nuk e ka pranuar ftesën e përsëritur dhe këmbëngulëse për të dalë në mbrëmje për birra, ajo pastaj është etiketuar dhe është larguar”.

Bala ka thënë se si Sekretariat i Gruas Aktiviste ka hasur në pengesa për adresimin e këtyre çështjeve, “për shkak se vendimet në Sekretariat të Përgjithshëm janë marrë me vendim direkt të ish-sekretarit. Unë nuk di asnjë rast në Lëvizje, jo vetëm në lidhje me këtë problem, që të jetë bërë diçka ndryshe nga çka ka vendosur ai”.

Në fund të postimit, Bala ka refuzuar të flasë me emra, duke thënë se një gjë të tillë mund ta bëjnë vetëm personat që janë ndjerë të abuzuar.

Lajme të ngjashme

Leave a Reply

Your email address will not be published. Required fields are marked *

Back to top button