A do t’u hiqet mandati dy deputetëve? KQZ vendos nesër për Rakipin dhe Rehovicën
Komisioni Qendror i Zgjedhjeve do të vendosë mbledhjen e ditës së nesërme për fatin e dy deputetëve Gledion Rehovica dhe Aqif Rakipi.
Prokuroria e përgjithshme ka kërkuar pak ditë më parë ndërprerjen e mandatit për deputetin e PDIU-së dhe atë të LSI-së, të cilët sipas saj rezultojnë së nuk kanë zbatuar ligjin e dekriminalizimit.
Sipas vendimit të prokurorisë, të dy deputetëve ju janë marrë shenjat e gishtave në shkurt dhe i janë dhënë Interpolit. Në datën 22 dhjetor Interpol Roma solli të dhëna interesante për dy deputetët.
Për deputetin e PDIU-së, Rakipi Interpol Roma thotë se ai është raportuar për vjedhje me emrin Skënder Ejylbegaj. Vjedhja në fjalë ka ndodhur në 03.11.1998, kohë kur deputeti ka deklaruar në formularin e dekriminalizimit se ka qenë emigrant në Itali.
Deputeti i LSI-së, Gledion Rehovica sipas Interpol Romës, është i raportuar për vjedhje dyqani me emrin Kusta Mina në 27.02.1999, kohë kur vetë deputeti ka deklaruar se jetonte në Itali si student.
Të dy deputetët nuk deklaruan ndalimet në formular dhe as përdorimin e emrave të tjerë, çka sipas ligjit të dekriminalizimit përbën arsye për ndërprerje të menjëhershme mandati.
KQZ do të mblidhet për të marrë në shqyrtim 5 vendime të prokurorisë, dy që kërkojnë heqje mandati për Rehovicën dhe Rakipin, dhe tre të tjera që arrijnë në konkluzionin se zyrtarët nuk preken nga dekriminalizimi.
