Turqi, sulm terrorist ndaj ushtarëve në Bitlis
Të paktën dy ushtarë turq kanë humbur jetën gjatë një sulmi me bombë që ndodhi në lindje të Turqisë. Lajmi bëhet i ditur nga autoritetet locale që akuzojnë Partinë Punëtore të Kurdëve, PKK. Sulmi ndodhi në provincën lindore Bitlis, ndërsa nga shpërthimi i fuqishëm u plagos dhe një civil, shkruan Abcnews.com.
Forcat turke të sigurisë filluan kërkim të gjerë për agresorët. PKK gjendet në listën e organizatave terroriste në Turqi, SHBA dhe Bashkimin Europian. Bëhet fjalë për një organizatë e cila më shumë se tre dekada zhvillon fushatë të armatosur kundër Turqisë.
Këtë fushatë e intensifikoi në korrik të vitit 2015 dhe në këto sulme kanë humbur jetën më shumë se 1.200 persona, duke përfshirë edhe pjesëtarë të forcave turke të sigurisë dhe civilë.