Presidenti i Sudanit ka falur qindra të burgosur
Presidenti i Sudanit, Omer el-Beshir, ka falur 259 të burgosur, në mesin e të cilëve kishte edhe nga ata që ishin dënuar me varje, transmeton Anadolu Agency (AA).
Lajmi është bërë i ditur nga agjencia e lajmeve zyrtare e Sudanit, SUNA. Sipas këtij lajmi thuhet se vendimi për faljen e të burgosurve është bërë me qëllim “forcimin e shpirtit të pajtimit dhe për një paqe të qëndrueshme”.
Ndërkohë theksohet se personat e falur nga Beshir janë të gjithë të përfshirë në grupet që luftonin kundër qeverisë në rajonin Darfur të Sudanit.
Nga ana tjetër Lëvizja Veriore për Shpëtimin Popullor të Sudanit (SPLM-N) 3 ditë më parë liroi 125 persona të cilët i kishte marrë peng.
Disa organizata në rajonin Darfur janë duke luftuar kundër qeverisë që prej vitit 2003. Ndërsa SPLM-N ka nisur një kryengritje në rajonin e Kordofan-it Jugor dhe Nilit të Kaltërt për shpalljen e pavarësisë nga Sudani.
