MPJ: Qytetarët e RMV-së në Sudan të sigurt, punojmë për t’i kthyer në vend
Ministria e Punëve të Jashtme e RMV-së informoi se shtetasit e Maqedonisë në Sudan janë të sigurt dhe po punohet për kthimin e tyre në vend. “Pas marrjes së informacionit për një familje tetë anëtarëshe, shtetasë të Republikës së Maqedonisë së Veriut, e cila ndodhet në zonat e rrezikuara të Sudanit, Ministria e Punëve të Jashtme, përmes Ambasadës së saj në Kajro, menjëherë hyri në kontakt dhe mori konfirmimin se të gjithë anëtarët e saj janë në gjendje të mirë shëndetësore”, thuhet në njoftimin e MPJ-së, transmeton Portalb.mk.
“Nëpërmjet rrjetit diplomatik në rajon, Ministria është në komunikim të vazhdueshëm me kolegë nga vendet mike, Ambasadat e të cilëve janë ende aktive në territorin e Sudanit. Ju informojmë se po zhvillohen aktivitete për të siguruar evakuimin e menjëhershëm të familjes dhe transferimin në një vend të sigurt nga ku më pas edhe transferimin për në vendin tonë”, thuhet në kumtesë.
Lidhur me katër shtetasit tanë të cilët paraprakisht u larguan nga Sudani për në Arabinë Saudite, MPJ njoftoi se ndodhen në vend të sigurtë, në gjendje të mirë shëndetësore dhe së shpejti do të kthehen në vend.
“Me këtë rast, përsërisim apelin tonë nëse ka shtetasë tanë që gjenden në territorin e Sudanit, ta kontaktojnë Ambasadën e Republikës së Maqedonisë së Veriut në Kajro në numrin +201033615542 dhe e-mailin [email protected], Ambasadën e Republikës së Maqedonisë së Veriut në Abu Dhabi në numrin e telefonit +971 56 441 7532 dhe e-mail adresën [email protected], si dhe Ministrinë e Punëve të Jashtme në SOS numrin + 389 75 273 732 dhe e-mailin [email protected]”, thuhet në njoftim.
Kujtojmë se nga Sudani, i cili është përfshirë me përleshje të armatosura, janë evakuuar katër shtetas të Republikës së Maqedonisë së Veriut
