KB: Nëse konfirmohen sulmet kimike në Mosul, ato janë krime lufte
Nëse do të konfirmohen sulmet kimike në Mosul, ato paraqesin shkelje serioze të së drejtës ndërkombëtare humanitare dhe krime lufte, deklaroi koordinatori humanitar i KB-së për Irakun, Liz Grande, i cituar nga mediat amerikane.
“Kjo është e tmerrshme. Asnjëherë nuk ka arsyetim, asnjë lloj arsyetimi për përdorimin e armëve kimike “, tha ajo.
Dymbëdhjetë persona, midis të cilëve edhe gra dhe fëmijë, janë sjellë në spital për shkak të problemeve të shkaktuara nga ekspozimi i mundshëm në armë kimike.
Sulmi i supozuar kimik u krye këtë javë në pjesën lindore në Mosul, që në janar u shpall tërësisht i liruar nga ana e forcave irakiane, në rajon në afërsi të lumit Tigër, i cili qytetin e ndan në dy pjesë.
Pjesa më e madhe e Mosulit Perëndimor edhe më tej ndodhet nën kontrollin e grupit Shteti Islamik.