Tërmet prej 5,5 ballësh në Adëjaman të Turqisë
Sipas konstatimeve të Departamentit për Hulumtimin e Tërmeteve pranë Drejtorisë Turke për Menaxhimin e Katastrofave dhe Gjendjeve Emergjente (AFAD), sot në orën 14:07 sipas kohës lokale, rajoni Samsat në Adëjaman të Turqisë u godit nga një tërmet prej 5,5 ballësh sipas Rihterit, raporton Anadolu Agency (AA).
Bëhet e ditur se tërmeti është shkaktuar në thellësi prej 11,3 kilometrash. Në rajonin e njëjtë, në orën 14:18 sipas kohës lokale, është regjistruar një tërmet tjetër me intensitet prej 4,4 ballësh.
– Disa shtëpi janë rrënuar
Kryetari i Bashkisë së Samsatit, Yusuf Fırat, bëri të ditur se si pasojë e tërmetit janë shembur disa shtëpi, duke njoftuar për dëme edhe në një shkollë, në të cilën nuk ka pasur nxënës të lënduar.
Ndërkaq, Bülent Fırat, kryetari i Odës së Bujqësisë në Adëjaman, tha se dëme janë shkaktuar edhe në disa fshatra, ku banorët kanë braktisur shtëpitë.
“Para pak kohe, në fshatrat Goktarla, Këzëlloz dhe Doanxha u takova me banorët. Disa shtëpi janë rrënuar”, deklaroi Fırat.
– “Dy persona janë lënduar lehtë”
Nga ana tjetër, zëvendëskryeministri i Turqisë, Veysi Kaynak, njoftoi për dy të lënduar si pasojë e tërmetit.
“Në fshatrat Akdamar dhe Tashkuju ka ndërtesa të dëmtuara. Dy persona janë lënduar lehtë. Falë Zotit, nuk kemi të lënduar rëndë apo persona që kanë humbur jetën”, theksoi Kaynak
