Sot duhet të vazhdojë gjykimi i Zaevit për rastin “Ryshfeti”
Sot në ora 10 në Gjykatën Themelore Shkupi 1 duhet të vazhdojë procesi gjyqësor kundër liderit të LSDM-së, Zoran Zaev, për rastin “Ryshfeti”, njofton Portalb.
Zaev, sipas akuzës, ngarkohet se në cilësinë e personit zyrtar si kryetar i Komunës së Strumicës, nga biznesmeni, Ivan Nikollov, ka kërkuar ryshfet prej 163.924 euro, gjegjësisht nga 2 euro për metër katror tokë ndërtimtare në Strumicës, për të cilën Nikollov ka qenë i interesuar që të privatizohet.
Gjykimi i liderit të LSDM-së për këtë rast deri më tani disa herë është anuluar. Seanca m parë duhej të mbahet më 22 nëntor, por u anulua për sot pasi që në seancë nuk janë paraqitur avokatët e Zaevit, për këtë vet ai kërkoi që gjykimi të ricaktohet për pas zgjedhjeve, për shkak të kohës së ngjeshur me fushatën.
Procesin gjyqësor kundër Zaevit për rastin “Ryshfeti” e udhëheqë gjykatësja Dijana Gruevska-Ilievska, e cila njëkohësisht është edhe zëvendëskryetare e Gjykatës Themelore Shkupi 1. /Portalb
