Pezullohet ndalesa për burkinin edhe në një komunë të Francës
Gjykata administrative ka pezulluar ndalesën e burkinit që zbatohej në një komunë të Francës, raporton Anadolu Agency (AA).
Gjykata Administrative në Lile ka bërë të ditur se e ka pezulluar ndalesën e burkinit që zbatohej nga Komuna Touquet e cila gjendet në veri të Francës.
Gjykata ka vendosur se ndalesa në Komunën Touquet, e cila është nën drejtimin e republikanëve, parti kjo e ish-presidentit Nicolas Sarkozy, “dëmton në masë shumë të madhe të drejtat dhe liritë individuale”.
Debati në lidhje me burkinin e femrave muslimane në Francë kishte filluar muajin e kaluar kur një shoqatë femrash në Marsej mori me qira një pishinë për një ditë dhe i paralajmëroi pjesëtaret e shoqatës që mos të vinin me bikini për shkak se në pishinë gjenden edhe trajnues meshkuj.
Aktiviteti që planifikohej të organizohej në shtator, ishte anuluar nga drejtuesit e pishinës dhe Komuna Pennes-Mirabeau me arsyetimin për siguri.
Pas ngjarjes në Marsej, edhe komunat e Kanës dhe Villneuve-Loubet në brigjet jugore të vendit si dhe shumë bashki të tjera, po ashtu e ndaluan burkinin në plazhe.
Nga ana tjetër, Gjykata e Larë në Francë, pas apelit të Ligës së të Drejtave të Njeriut dhe Shoqatës për Luftimin e Islamofobisë në Francë, e kishte anuluar ndalesën e burkinit të iniciuar nga Komuna Villeneuve-Loubet dhe të futur në fuqi nga Gjykata Administrative e Nices.
Në vendimin e Gjykatës së Lartë thuhej se veshja e preferuar e disa personave në Villeneuve-Loubet nuk ka prishur rendin publik dhe se pa pasur rreziqe në plazhet e komunës nuk do të zbatohet një ndalesë e tillë.
Edhe pse vendimi i Gjykatës së Lartë përbën një precedent, disa komuna kishin vazhduar me zbatimin e ndalesës