Turqi, qytetarët kanë shitur valutë në vlerë prej 10.8 miliardë dollarë pas puçit të dështuar
Pas tentativës për grusht shteti nga Organizata Terroriste FETO në Turqi, në dy javët e kaluara depozitat bankare në valuta të huaja kanë pësuar rënie për 6,2 përqind, konkretisht kanë rënë në 163,3 miliardë dollarë, gjendje kjo që tregon se qytetarët e Turqisë në këtë periudhë kanë shitur valutë në vlerë prej 10,8 miliardë dollarë, raporton Anadolu Agency (AA).
Banka Qendrore e Republikës së Turqisë (TCMB) ka publikuar Statistikat Javore të Parave dhe Bankave.
Sipas këtyre statistikave, depozitat e përgjithshme në valuta të huaja në bankat depozitare dhe në të ashtuquajturat bankat e participimit në Turqi pas tentativës për grusht shteti nga FETO, konkretisht në periudhën 15-29 korrik, kanë shënuar rënie të theksuar në bazë dollari.
Depozitat në valuta të huaja në periudhën dyjavore kanë pësuar rënie për 6,2 përqind, konkretisht kanë rënë nga 174 miliardë e 120 milionë dollarë në 163 miliardë e 295 milionë dollarë. Pra, depozitat në valuta të huaja brenda dy javëve janë zvogëluar për 10 miliardë e 825 milionë dollarë.
Nga ana tjetër, vëllimi i përgjithshëm i kredisë në sektorin e bankave (përfshirë edhe TCMB-në), deri më 29 korrik, që paraqet përfundimin e periudhës dyjavore që nga 15 korriku, është zvogëluar për 2 miliardë e 749 milionë e 945 mijë lira. Në këtë mënyrë, vëllimi i përgjithshëm i kredisë në këtë periudhë, nga 1 trilionë e 548 miliardë e 511 milionë e 196 mijë lira ka rënë në 1 trilion e 545 miliardë e 761 milionë e 251 mijë lira.
Vëllimi i përgjithshëm i kredisë një javë para 29 korrikut pësoi rënie për 0,18 përqind në krahasim me javën para saj, ndërkohë që krahasuar me periudhën e njëjtë të vitit të kaluar, ai ka shënuar rritje për 10,54 përqind.
Nga kreditë e dhëna, 1 trilionë e 509 miliardë e 980 milionë e 413 mijë lira u shfrytëzuan nga kategoria jofinanciare, ndërsa 35 miliardë e 780 milionë e 838 mijë lira u shfrytëzuan nga kategoria financiare.
