BDI: Bojkot i përhershëm nëse nuk pranohet presidenti konsenzual
BDI-ja do të shqyrtojë mos pjesëmarrjen në të gjitha zgjedhjet e ardhshme presidenciale, nëse VMRO-ja refuzon idenë për kandidat konsenzual.
Zëdhënësi i BDI-së Bujar Osmani theksoi se mos pjesëmarrja në zgjedhjet presidenciale është ndër alternativat më serioze të BDI-së, për të zhveshur legjitimitetin e presidentit që nuk do të jetë i pranueshëm edhe për shqiptarët.
“Nuk ka kryetar legjitim i Maqedonisë pa vullnetin e shqiptarëve, dhe këtë projekt e kemi shtruar te partitë politike dhe opinioni se ka ardhur momenti që edhe kryetari i shtetit të reflektojë vullnetin e dy komuniteteve më të mëdha. Është opsion i BDI-së mos pjesëmarrja në cikël zgjedhor ku nuk respektohet vullneti i shqiptarëve. Nuk bëjmë fjalë për këtë cikël zgjedhor, por cilindo në të ardhmen”, tha Bujar Osmani, BDI.
Përderisa BDI-ja pret përgjigje zyrtare, VMRO DPMNE-ja ripërsërit qëndrimin e saj se kandidati për president do të zgjidhet vetëm në procedurë të brendshme partiake, në konventën zgjedhore të 1 marsit.
