Meha akord me Al Nasr, do të largohet nga Konayspor

Alban Meha do ta mbyllë në fund të sezonit aventurën me Konyasporin në Superligën e Turqisë.

Mediat turke kanë zbuluar se 30-vjeçari ka arritur marrëveshjen me Al Nasr, skuadër e Emirateve të Bashkuara Arabe, të cilës do t’i bashkohet sapo të nisin përgatitijet për sezonin e ardhshëm.

Një lajm befasues për vetë tifozët e Konysasporit, që besonin se futbollisti i kombëtares shqiptare do të vijonte karrierën në Turqi, pasi i kshin ofruar rinovimin e kontratës për tre sezonet e ardhshme.

Oferta e skuadrës me qendër në Dubai ka qenë e parezistueshme për shqiptarin, i cili nuk ka pranuar ta vijojë karrierën në Turqi.

Meha shkëlqeu në radhët e Konyasporit sidomos gjatë pjesës së parë të sezonit. Në 23 ndeshje të kampionatit ka mundur të shënojë 4 gola si dhe ka dhënë 5 asist, raporton Superport.

I vetëdijshëm për mundësitë e pakta që ka për të qenë pjesë e Shqipërisë në Euro 2016, Meha e ka lënë të hapur mundësinë për t’iu bashkuar Kosovës, që pritet të bëhet së shpejti anëtarja më e re e familjes së madhe të futbollit botëror.