Sot Shutova fillon betejën për titullin kampion
KV Shutova sot do të ketë përballë kampionin aktual KV Strumicën. Sigurisht se kjo ndeshje ka zgjuar interesim të madh, pasi Shutova javën e kaluar fitoi titull e parë, atë të Kupës së Maqedonisë dhe tani është në kërkim të shtojë edhe një trofe në vitrinat e saja.
Kërçovarët e kanë shfrytëzuar në maksimum këtë javë për tu përgatitur dhe janë të mendimit se edhe këtë sfidë do ta kalojnë me sukses, këtë më së miri e ka thënë trajneri i skuadrës Bejtulla Emini.
“Pas finales se kupës në ekip ka një atmosferë të jashtëzakonshme si te lojtarët ashtu edhe te kryesia dhe tifozeria e Shutovës. Mendoj që nëse do të ketë referim korrekt Shutova edhe gjatë ndeshjeve të “Play Off”-it, do të dalim fitues dhe do të fitojmë kurorën e dyfishtë.
Kemi ekip më të mirë se Strumica. Kjo nuk do të thotë se ne e nënvlerësojmë Strumicën dhe nuk do te jetë e lehtë për ne, mirëpo Shutova kësaj here do të mposht Strumicën. E them këtë sepse kam analizuar në detaje ekipin kundërshtar dhe nga analizat del se ekipi im ka lojtarë me cilësor dhe më e rëndësishmja se ekipi është në kulmin e formës sportive”, ka thënë trajneri Emini.
Për të arritur deri te titulli kampion, njëra nga ekipet duhet të arkëtojë tri fitore. Ndeshja e parë do të luhet në Kërçovë, në sallën “Pallati i Ri”, me fillim në ora 18:00.