Saraçini: Intensifikohet bashkëpunimi ndërmjet Kroacisë dhe Maqedonisë

Ministri i Ekonomisë, Valon Saraçini sot realizoi takim bilateral me përfaqësuesit e delegacionit zyrtar të Republikës së Kroacisë, të kryesuar nga Ministri i Ekonomisë Ivan Vërdolak. Duke i uruar anëtarësimin e Republikës së Kroacisë në Bashkimin Evropian, Saraçini, theksoi se me hyrjen e Kroacisë në BE, bashkëpunimi ekonomik dhe afarist  do vazhdojë në harmonizim me marrëveshjen për stabilizim dhe asocim ndërmjet Republikës së Maqedonisë dhe BE-së. 

“Republika e Maqedonisë dhe Republika e Kroacisë kanë marrëdhënie politike shumë të mira, kurse detyra jonë si ministra është të përpiqemi që këto marrëdhënie të reflektohen edhe në sferën e ekonomisë. Vetëm pas një muaji  nga vizita në Kroaci i kemi realizuar të gjitha pikat të cilat i patëm kontraktuar. Investimi i paralajmëruar kroat prej 6 milionë eurosh për hapjen e fabrikës për ujë të ambalazhuar “Mali Loshinj”, tani më ka filluar të implementohet”, informoi Ministri Saraçini.

Saraçini, theksoi se nga ky takim bilateral, ajo që doli si përfundim është hapja e zyrave në vetë ministritë e të dy shteteve,  qëllimi i të cilave do  të jetë përkrahja e kompanive në administrim biznesi, si dhe mundësia që kompanitë e Maqedonisë të drejtohen në Zyrën në Kroaci, kurse ato të Kroacisë në zyrën në Maqedoni.

Pas takimit u nënshkrua Marrëveshja për ndryshim dhe plotësimin e Marrëveshjes për bashkëpunim ekonomik dhe tregtar, mes dy vendeve, të harmonizuar me legjislaturën evropiane, me të cilën krijohet korniza juridike për thellimin e bashkëpunimit afatgjatë në shumë lëmi si në prodhim makinash, energjetikë, industri elektronike, infrastrukturë, bujqësi, industri ushqimore, farmaceutike, industri kimike, industri e drurit, bashkëpunim në mes ndërmarrjeve të vogla dhe të mesme, turizëm si dhe në lëmi tjera të  bashkëpunimit ekonomik dhe industrial, të cilët në mënyrë reciproke mund të kontraktohen.