PS mbledh Asamblenë Kombëtare

Partia Socialiste, pritet të mbledhi të mërkurën në mesditë Asamblenë Kombëtare, në prag të mbajtjes së kongresit të saj të 19 marsit. Sipas njoftimit të shpërndarë me këtë rast 6 do të jenë pikat e rendit të ditës që do të diskutojë forumi socialist.

Një ndër kryesoret do të jetë kërkesa e disa deputetëve socialist për votimin e kryetarit të partisë, por edhe ndryshimet në statut. Pak ditë më parë kryesia e PS zhvilloi mbledhjen e saj, ku sipas burimeve të brendshme ka patur replika të forta mes kryetarit Rama dhe deputetit Blushi. Ky i fundit prej kohësh ka ndërmarrë një fushatë kritikash të ashpra ndaj kreut të partisë, njëherësh dhe kryeministrit të vendit zotit Rama, duke e akuzuar ndër të tjera se nuk ka pranuar të bëjë zgjedhje për postin e kryetarit. Zoti Rama është përgjigjur se fitoret e zgjedhjeve të përgjithshme në vitin 2013 dhe ato lokale në 2015 e kanë konfirmuar udhëheqjen e PS.