Ahmeti takohet me ambasadoren belge
Sot në selinë e Bashkimit Demokratik për Integrim, Kryetari Ali Ahmeti, ka takuar Ambasadoren e Belgjikës, Anik Van Kalster, e cila mbulon Maqedoninë nga Sofja e Bulgarisë.
Kryetari Ahmet i falënderoi Ambasadoren Belge për ndihmesën rreth organizimit të vizitës në Bruksel dhe u shpreh mjaft i kënaqur nga takimet me bashkëbiseduesit belg duke shpresuar në ndihmën e tyre për zgjidhjen e çështjes së emrit.
Kryetari Ahmeti foli për takimet në Bruksel, Hagë dhe Paris dhe nënvizoi nevojën që institucionet e Bashkimit Evropian, por edhe vendet anëtare, të angazhohen në zgjidhjen e çështjes së emrit që pengojnë integrimet EuroAtlantike të Maqedonisë.
Bashkimi Demokratik për Integrim përkrah zgjidhjen e çështjes së emrit dhe arritjen e kompromisit me fqinjin tonë jugor, por çështje të tilla madhore kërkojnë konsensus etnik dhe pajtueshmëri të të dy komuniteteve shumicë në Maqedoni.
Shqiptarët janë të përcaktuar për anëtarësim të vendit tonë në NATO dhe BE dhe ky proces do të përmirësojë jo vetëm marrëdhëniet nder fqinjësore, por edhe marrëdhëniet ndëretnike dhe do të mundësojë krijimin e klimës për investime të drejtpërdrejta dhe hapjen e vendeve të punës.