Në Universitetin Shtetëror të Tetovës u bë prezantimi i WikiAlbania

Në Universitetin Shtetëror të Tetovës, sot u bë prezantimi i WikiAlbania për enciklopedinë Wikipedia në gjuhën shqipe. 

Ky aktivitet është projekt i përbashkët i USHT-së në bashkëpunim me Shoqatën Open Labs nga Shqipëria, e cila është themeluese e WikiAkademisë Shqiptare në Shqipëri dhe Shoqatës ,,Josif Bageri” nga Maqedonia. 

Me këtë rast, koordinatori i USHT-së në këtë projekt, Festim Halili, para të pranishmëve tha se qëllimi i WikiAkademisë shqiptare dhe i turneut që përfaqësuesit e saj realizojnë në vendet ku flitet dhe mësohet shqip është që të përmirësojë cilësinë dhe sasinë e përmbajtjes së informacionit të hapur. 

“Besoj që të gjithë jemi të njohur me enciklopedinë më të madhe elektronike Wikipedia, e cila është themeluar që nga viti 2001 nga Jammy Wales dhe Larry Sanger dhe që në vete ngërthen mbi katër milionë artikuj, që të gjithë të interesuarit mund t’i qasen dhe të marrin informatat që u nevojiten”, tha Halili. 

Qëllimi i WikiAkademisë Shqiptare dhe i turneut që ata realizojnë në vendet ku flitet dhe mësohet shqip është të që ta përmirësojë cilësinë dhe sasinë e përmbajtjes së informacionit të hapur (open source) në gjuhën shqipe, si dhe për ta përfaqësuar sa më mirë kombin tonë, shtoi mes tjerash Halili. 

WikiAkademia Shqiptare (beta), në Tetovë realizon për herë të parë në Maqedoni këtë project.