Shesheli duhet të kthehet në Hagë para zgjedhjeve në Serbi

Aktgjykimi ndaj të parit të Partisë Radikale Serbe, Vojisllav Sheshelit, do të lexohet deri në fund të marsit, ndërsa ai, në valën e fushatës zgjedhore në Serbi, në atë kohë do të jetë i detyruar të shkojë në Hagë që ta dëgjojë fjalën e gjykatësve në gjykatë.

Por ai, siç shkruajnë mediet e Beogradit, atje nuk do të shkojë vullnetarisht, që do të thotë se autoritetet e Tribunalit do të kërkojnë nga autoritetet serbe që ta arrestojnë dhe ta përcjellin atje.
Gazeta “Novosti” shkruan, transmeton Koha.net, se në Scheveningen i është konfirmuar se në çerekun e parë të vitit 2016 pritet që të shpallet aktgjykimi ndaj Sheshelit.
Pavarësisht nga kjo Shesheli po bëhet gati për zgjedhjet e parakohshme në Serbi, të paralajmëruara për muajin prill.

I akuzuari me stazhin më të gjatë për krime lufte, Vojisllav Sheshel, ishte liruar përkohësisht në nëntor të vitit të kaluar, me arsyetimin – për shkak të gjendjes së tij shëndetësore, ndërsa fjala përfundimtare në gjykatë ishte dhënë në mars të vitit 2012.