“Meritojmë më mirë” qytetarët me performans përpara Qeverisë në Shkup

Sot, përpara godinës së Qeverisë së Republikës së Maqedonisë, një grup i aktivistëve të shoqërisë civile u dërguan mesazhe krerëve të qeverisë dhe të gjithë atyre që do të kandidohen në zgjedhjet e prillit se qytetarët nuk meritojnë një qeveri e cila kërkon hua, që vjedh dhe që mashtron, njofton Portalb.

“Nuk meritojmë pushtet, i cili i fut në borxhe fëmijët dhe nipërit tanë. Nuk meritojmë pushtet, i cili shpenzon pa përgjegjësi për çokolata, kur nuk kemi as për bukë. Prej vitit 2006, pushteti na ka futur në borxhe prej më shumë se 4 miliardë dollarë. Kush do t’i shlyejë këto borxhe? Prandaj, kërkojmë pushtet, i cili nuk do të shpenzojë për luks, por do të luftojë kundër varfërisë. Kërkojmë përgjegjësi prej pushtetit për çdo gjë që është vjedhur prej qytetarëve, ndërsa të hollat e vjedhura t’ua kthejnë qytetarëve. Në Maqedoni i tolerojmë shumë gjatë politikanët e korruptuar. Kërkojmë që korrupsioni të mos jetë veprimtari e levërdishme. Kërkojmë që politikanët të mos ndjehen të sigurt dhe të përgjigjen nëse vjedhin, gënjejnë dhe janë të korruptuar.”, thonë nga iniciativa qytetare “Meritojmë më mirë”, njofton Portalb.

Nga platforma qytetare thonë se “qytetarët kanë të drejtë t’i kontrollojnë politikanët, ta dinë gjendjen e tyre pronësore dhe të pyesin se si ata i shpenzojnë paratë e tyre. Ata besojnë se qytetarët meritojnë që paratë publike të përdoren për nevojat e tyre reale, e jo të hollat e qytetarëve të shfrytëzohen për monumente, parmakë bronze, mercedesë dhe udhëtime.”

Aktivistët e “Meritojmë më mirë!” i mbështetën edhe ish-punonjësit e OHIS-it të cilët gjithashtu protestuan para godinës së qeverisë dhe kërkonin 24 pagat që nuk i kanë marrë deri më tani. /Portalb