Rama, letër homologut francez: Franca di si të ripërtërihet
Një ditë pas masakrës në Paris, ku u vranë rreth 150 njerëz nga disa sulme terroriste, kryeministri Edi Rama i ka dërguar një letër homologut francez Manuel Valls, të cilit i shpreh ngushëllimet për familjet dhe të afërmit e viktimave.
Në letër, kreu i qeverisë shqiptare ndan dhimbjen e shqiptarëve për popullin francez ndërsa e cilëson Francën si një dëshmi e gjallë e përpjekjes për qytetërim.
Ja letra e plotë
Fort i dashur Manuel Valls,
Shqiptarët po e përjetojnë me dhimbje dhe me revoltë të patregueshme ndodhinë e sotme në zemrën e qytetërimit europian të lirive e të drejtave të njeriut. Jam i bindur se megjithatë, askush nuk mund ta përjetojë dhimbjen për plagën e hapur sot siç e përjetojnë vetë francezët, prandaj lejomëni, i nderuar Kryeministër, t’Ju shpreh ngushëllimet dhe solidaritetin më të ndjerë të Shqipërisë ndaj Francës.
Kjo është një plagë e hapur barbarisht për të tmerruar Francën, Europën, popujt e lirë të botës sonë demokratike dhe për të na imponuar braktisjen e pamundur të vlerave të kësaj bote që Franca aq solemnisht i mishëron.
Por jam i sigurt se goditja barbare e një monumenti të gjallë të moralit të lirisë si Charlie Hebdo dhe marrja e jetëve të pafajshme të gazetarëve të talentuar të një gazete të mirënjohur franceze, do rrisë vetëdijen e të gjithë popujve tanë për pasurinë e jashtëzakonshme njerëzore që qytetërimi ynë përfaqëson. Do të rrisë frymën e lirisë e të vëllazërimit mes të gjithë popujve të botës demokratike. Do të rrisë përpjekjen e përbashkët dhe pa asnjë iluzion të të gjithëve ne kundër errësirës terroriste, në këtë përballje të egër ku edhe Shqipëria e vëllazërisë fetare dhe e përkatësisë pa asnjë ekuivok në krahun e duhur të historisë, do të vazhdojë të luaj vendosmërisht rolin e saj.
Duke Ju uruar që të gjeni forcën e jashtëzakonshme për ta përballua r sfidën kolosale ku e sotmja e ka venë Francën dhe Ju personalisht, si kreu i qeverisë së saj, lejomëni Zoti Kryeministër, që bashkë me ngushëllimet e mia, t’Ju përcjell edhe ndjenjën e miqësisë më të sinqertë.
I juaji gjithmonë
Edi Rama
