Maqedoni, mbi 50 shkolla nuk kanë para për ngrohje
Në bazë të analizave, buxheti nga viti 2001 deri tani është rritur për 230 për qind dhe nga një miliardë e 300 milionë euro, vitin e ardhshëm rritja pritet të jetë tre miliardë e 200 milionë. Nga këto para, 143 milion euro parashikohen për shkollat fillore dhe 66 milionë për shkollat e mesme. Teksa institucionet hedhin përgjegjësinë njëra tjetrës për këtë problem, një pjesë e fëmijëve për momentin mësojnë në klasa të ftohta, njofton Alsat-M.
Nga Ministria e Financave thonë: “Kjo nuk është nën kompetencën tonë. Problemi me shkollat dhe fondet për to janë nën kompetencë të Ministrisë së Arsimit”.
Por nga Ministria e Arsimit deklarojnë se: “Fondet për shkollat fillore dhe të mesme në të gjitha komunat i dërgojmë në kohë të duhur. Nuk ka probleme me to, por mbetet të shihet nëse paratë e destinuara për shkollat kryetarët e komunave i menaxhojnë dhe i përdorin për këtë qëllim”.
Sipas akademikut Izet Zeqirit, problem i madh me fondet e parashikuara për shkollat përbën shpërndarja e tyre e drejtë.
Buxheti për vitin 2016, i cili aktualisht është në procedurë parlamentare, do të jetë shumë më i madh në krahasim me vitet e tjera. Megjithatë, në fillim të sezonit të ngrohjes, më shumë se 50 shkolla nuk kishin para për ti ngrohur klasat.
