Shokohet NBA, Odom po lufton me vdekjen
Tronditet NBA, ish shtatlarti i disa prej skuadrave më të njohura të koshit amerikan, Lamar Odom është gjetur pa ndjenja në një shtëpi publike të Las Vegasit. Ish basketbollisti i Lakers, Clippers, Mavericks dhe Heat ndodhej një lokalitetin Crystal, rreth 70 km larg kryeqendrës së Nevadas nga ku transportua me një ambulabncë për në një spital të specializuar pasi trupi i tij 208 cm i gjatë, nuk mund të zhvendosej me një helikopter. Sipas pronarit të shtëpisë publike në të cilën ndodhej Odom, basketbollisti dëshironte të kalonte disa ditë në shoqërinë e femrave pasi dukej shumë i stresuar.
Lamar që konsiderohej si një nga talentet më të mëdhenj të koshit amerikan ka lënë shenjë me fanellën e Lakersave ku fitoi titujt në vitet 2009 dhe 2010. Ish bashkëshorti i Khloe Kardashian e mbylli karrierën në NBA gjatë vitit 2013 dhe pas një aventure të shkurtër në Europë me Laboral, provoi të rikthehej nën urdhrat e Phil Jackson te New York Knicks por nuk arriti të ishte i suksesshëm. Sipas mediave amerikane, Odom kishte porositur një shishe konjak por nuk e kishte përfunduar, ndërsa në dhomën e tij janë gjetur edhe shumë ilaçe dhe drogë që mendohet se kanë shkaktuar problemet shëndetësore të 35-vjeçarit që po lufton me vdekjen. Mjekët mbeten pesimistë rreth gjendjes së tij pasi zemra nuk po reagon mirë, ndërsa probleme të mëdha ai ka edhe me mushkëritë.
