PPD: Zgjedhjet e parakohëshme duhet të bëhen me legjislativë të re zgjedhore
Partia për Prosperitet Demokratik konsideron se zgjedhjet e parakohëshme duhet të bëhen me legjislativë të re zgjedhore duke përfshirë këtu edhe ndryshime rrënjësore në Ligjin për rregjistrimin e qëndrimit dhe vendbanimit i cili deri më tash ka qenë në funksion të mundësimit të manipulimeve të shumta zgjedhore që partitë në pushtet i bënë në dy cikluset e fundit zgjedhore e që u konstatuan edhe nga OSBE-ODIHR, disa parti politike dhe Komisioni Pribe.
PPD angazhohet që Maqedonia të jetë një njësi zgjedhore pa prag të definuar dhe zgjedhjet të realizohen me lista të hapura me çka proceset demokratike do të fitonin në cilësi.
PPD konsideron se ky propozim do të përkrahet fuqimisht nga Ali Ahmeti dhe partia e tij në bisedime me ekspertin belg Vanhojt sepse kështu lideri i BDI-së edhe në vepër do të dëshmonte se është kundër përimtësimit të votës shqiptare nëpërmjet pjesmarrjes së partive të vogla në procesin zgjedhor dhe jo nëpërmjet zhdukjes së tyre siç shpesh pat deklaruar disa herë me rradhë.
PPD konsideron se propozimi për Maqedoni me një njësi zgjedhore dhe me prag prej 3% i hudhur ditë më parë nga subjekti politik në formim e sipër është i dëmshëm për zgjedhësit shqiptarë sepse e zvogëlon peshën e votës shqiptare dhe është në favor të BDI-së dhe PDSH-së.
