Iran, raportohen raste të reja të helmimit serik të nxënëseve

Në një valë të re të helmimeve serike në Iran, mbi dhjetë nxënëse janë transferuar në një spital në periferi të Teheranit të shtunën, sipas raportimeve, transmeton Anadolu.

Mediat lokale cituan zyrtarë në Pardis, një periferi e vendosur 17 kilometra në verilindje të Teheranit, të kenë thënë se nxënëset në shkollën e vajzave “Khayyam” u ankuan se nuk ishin mirë pas një shpërthimi të një granate të improvizuar.

Era që dilte nga shpërthimi, kanë thënë ata, u shkaktoi nxënëseve marramendje dhe të paktën 15 prej tyre më pas u desh të dërgoheshin në një spital lokal.

Disa media thanë se simptomat ishin ato të “stresit” të shkaktuar nga shpërthimi. Të gjithë nxënëset kanë dalë nga spitali dhe hetimet janë duke vijuar.

Në një tjetër incident të raportuar nga qyteti verior Ardabil të shtunën, një video e publikuar në internet tregonte një ambulancë spitalore të parkuar jashtë një shkolle vajzash.

Më vonë gjatë ditës, mjekët në Qendrën e Urgjencës Mjekësore të Ardabilit u thanë mediave se disa nxënëse ishin ankuar për simptoma të tilla si ankth, vështirësi në frymëmarrje dhe dhimbje koke dhe ishin pranuar në spitale.

Shumica e këtyre nxënëseve janë liruar nga spitalet, thanë zyrtarët.

Gjithashtu të shtunën, raportime për helmime erdhën nga dy shkolla për vajza në provincën jugperëndimore Khuzestan, me një numër nxënësesh të dërguara në spital për trajtim.

Rastet e para të këtyre helmimeve serike u raportuan në nëntor në qytetin qendror Qom, kur dhjetëra nxënëse u shtruan në spital pasi u ankuan për të përziera, dhimbje koke, vështirësi në frymëmarrje, kollë dhe dhimbje trupi.

Nga Qomi, sëmundja misterioze u përhap në qytete të tjera në javët në vijim, duke përfshirë kryeqytetin Teheran.

Deri më 20 mars, kur përfundon viti kalendarik iranian, të paktën 1.200 nxënëse ishin pranuar në spitale në disa qytete iraniane pasi u ankuan për simptoma të lidhura me helmimin. Disa raportime e shpallin edhe më të lartë shifrën e shtrimeve në spital.

Rastet e reja të këtyre helmimeve serike u raportuan javën e kaluar në Tabriz dhe Qom. Në Tabriz, të paktën 20 nxënëse u dërguan në spital pasi u ankuan për probleme të frymëmarrjes.

Në Qom, qendër e turizmit fetar, të paktën shtatë nxënëse u shtruan në spital për dhimbje koke dhe marramendje për shkak të erës së gomës së djegur, thanë mediat.

Raste të ngjashme u raportuan gjithashtu në provincën juglindore Kerman javën e kaluar me të paktën nëntë nxënëse të pranuara në spital dhe dhjetë të tjera që janë trajtuar në shtëpitë e tyre në qytetin Bardsir.

Një komision parlamentar faktmbledhës që heton rastin pritet të dorëzojë raportin e tij në maj, sipas kreut të komisionit Hamidreza Kazemi.

Muajin e kaluar, Ministria e Brendshme e Iranit njoftoi arrestimin e 100 personave në provinca të shumta, duke përfshirë Teheranin, Qomin, Zanjanin, Khuzestanin dhe Azerbajxhanin Perëndimor në lidhje me helmimet.

Ministrisë i ishte kërkuar nga presidenti Ebrahim Raisi më 1 mars që të hetonte shkakun e sëmundjes misterioze pasi ajo tronditi gjithë vendin dhe ndezi protesta.

Ministria e Brendshme, duke cituar rezultatet paraprake të hetimit, tha se në mesin e të arrestuarve kishte njerëz që “për shkak të ligësisë apo aventurës dhe që synonin të mbyllnin shkollat”, përdorën “substanca me erë të keqe dhe të padëmshme” që rezultuan në helmime.

Udhëheqësi suprem i Iranit Ayatollah Ali Khamenei në komentet e tij të para mbi këtë çështje më 6 mars e quajti atë një “mëkat të madh dhe të pafalshëm”, duke udhëzuar autoritetet që “të ndjekin seriozisht çështjen”.

“Nëse vërtetohet se nxënëset janë helmuar, autorët e këtij krimi duhet të dënohen rëndë. Për këta persona nuk do të ketë amnisti”, tha ai.

Shefi i drejtësisë iraniane Mohseni Ejei e quajti këtë një shembull të “korrupsionit në tokë” dhe paralajmëroi për “dënim shembullor” për ata që zbulohen se janë përfshirë në të.