Në prag të përvjetorit të agresionit rus, Sllavjanka Petrovska nga Kievi shprehu mbështetjen për Ukrainën
Dy ditë para përkujtimit të përvjetorit të fillimit të pushtimit rus të Ukrainës, ministrja e Mbrojtjes së Maqedonisë së Veriut Sllavjanka Petrovska nga Kievi shprehu mbështetjen për mbrojtjen e sovranitetit dhe pavarësisë së Ukrainës. Ministrja Petrovska sot u takua me homologun e saj ukrainas, Oleksij Reznikov, njofton Ministria e Mbrojtjes, transmeton Portalb.mk.
“Unë shpreh respektin dhe mbështetjen time për ju, popullin ukrainas, për guximin, këmbënguljen dhe vendosmërinë tuaj për të mbrojtur territorin tuaj. Ky akt agresioni brutal dhe terrori ndaj popullatës civile, fëmijëve, grave, të moshuarve është i paimagjinueshëm për çdo qytetërim të shekullit të 21-të. Prandaj, Qeveria e Republikës së Maqedonisë së Veriut që në fillim e dënoi agresionin rus kundër Ukrainës, i cili është i pajustifikuar dhe i pa provokuar nga asgjë. Pa hezitim, ne qëndruam në anën e drejtësisë dhe dinjitetit njerëzor, në anën e së vërtetës”, tha Sllavjanka Petrovska në konferencën e sotme për shtyp me ministrin ukrainas të Mbrojtjes Oleksij Reznikov.
Petrovska i dërgoi një mesazh lidershipit ukrainas dhe popullit ukrainas se Maqedonia e Veriut e dënon fuqishëm agresionin rus kundër Ukrainës dhe ka dhënë mbështetje të plotë për sovranitetin e saj dhe të drejtën për vetëmbrojtje.
“Ne ishim të qartë dhe të zhurmshëm që në fillim të agresionit, pothuajse saktësisht një vit më parë kur i thamë jo gjakderdhjes, jo shkatërrimit në shekullin e 21-të. Paqja duhet të rivendoset menjëherë”, shtoi Petrovska.
Ministri iu referua ndihmave humanitare dhe ushtarake të ofruara për Ukrainën deri më tani, të cilat ne i ofrojmë sepse besojmë fort në të drejtën e çdo vendi për vetëmbrojtje dhe respektimin e rregullave dhe parimeve mbi të cilat bazohet komuniteti ndërkombëtar.
Ministri Reznikov shprehu mirënjohje të madhe për të gjithë mbështetjen e Maqedonisë së Veriut dhe tha se populli ukrainas nuk do ta harrojë këtë. Duke e quajtur Petrovskën një ministre të guximshme që udhëtoi në një vend të guximshëm në shenjë miqësie, Reznikov theksoi se Ukraina është e vendosur të rivendosë paqen.
“Jam i sigurt, nuk shpresoj, se takimi ynë i ardhshëm mund të jetë si anëtarë të barabartë të NATO-s dhe BE-së. Ukraina duhet të bëhet pjesë e kësaj familjeje dhe ne duhet ta fitojmë këtë luftë dhe do ta fitojmë këtë luftë së bashku”, tha ministri ukrainas i Mbrojtjes Reznikov.
Ndryshe, ministrja e Mbrojtjes Petrovska mbërriti sot në mëngjes për vizitë në Ukrainë, në shenjë mbështetjeje për udhëheqjen e Ukrainës dhe qytetarët ukrainas në luftën për të mbrojtur vendin e tyre dhe për të ruajtur sovranitetin e tyre.
Në Ukrainë, ministrja Petrovska vizitoi disa rajone të shkatërruara dhe rrënuara nga agresioni rus.
Vizita të tilla në Ukrainë kanë realizuat edhe ministri Bujar Osmani, si dhe kryeparlamentari Talat Xhaferi, ku është shprehur mbështetje për Qeverinë e Ukrainës dhe për përpjekjet për rivendosjen e paqes dhe stabilizimin e rajonit.
Në të gjitha vizitat, përfaqësuesit nga Maqedonia e Veriut kanë dënuar agresionin rus në Ukrainë, duke shprehur gatishmëri për bashkim të synimeve për rindërtimin e Ukrainës, pas përfundimit të kësaj lufte.
