Kontejnerë të mbushur me mbeturina ju thonë “mirë se vini” në Kodrën e Diellit (Foto)
Kontakti i parë para se të arrihet në Kodrën e Diellit janë kontejnerët me mbeturina të cilët sot ishin përplot dhe të pa pastruar, shkruan Portalb.mk.
Pamjet e tilla nuk janë aspak të hijshme për një qendër të tillë turistike, madje kontejnerët janë të vendosur në hyrje të qendrës turistike.
Kështu dukej sot ky lokacion.
Nga NPK “Tetova” për Portalb.mk thonë se mbeturinat pastrohen dy herë në javë.
“Sipas planit të punës së higjienës komunale, grumbullimi I mbeturinave në Kodrën e Diellit kryhet dy here në javë (e hënë dhe e premte)”, thonë nga NPK Tetova duke bashkëngjitur një fotografi kur i kanë pastruar të njëjtat.
Megjithatë, pamjet e sotme nga tereni dëshmonin të kundërtën.
Por, për këtë, nga NPK Tetova thonë se këto pamje vijnë si pasojë e bizneseve dhe hoteleve të cilat operojnë në këtë pjesë, sipas tyre ata u ikin pagesës së faturave të lira dhe mbeturinat i hedhin në kontejnerët që gjenden në hyrje, të cilat janë të dedikuara për qytetarët dhe lagjen e vikend shtëpizave.
Vendndodhja e grumbullimit të mbeturinave në Kodrën e Diellit është lokacion jo i qëlluar, pasi të njëjtat gjenden në hyrje të qendrës turistike. E kur këto të fundit grumbullohen në masë më të madhe dhe nuk pastrohen në kohë, krijojnë imazhe që japin një pasqyrë negative për Kodrën e Diellit.
Përndryshe, ky problem me mbeturinat është i kamotshëm, autoritetet nuk kanë gjetur zgjidhje për të njëjtin. Kjo më tepër paraqitet gjatë dimrit, kur edhe fluksi i qytetarëve është më i madh nga vizita e qendrës turistike.
