Kosova në heshtje zgjedhore, të dielën votohet për Parlamentin e ri

Kosova filloi mbrëmë në mesnatë heshtjen para zgjedhjeve të parakohshme parlamentare të së dielës së 8 qershorit. Zyrtarisht, heshtja zgjedhore fillon në 7 qershor dhe mbaron me mbylljen e vendvotimeve në mbrëmje.

Fushata zgjedhore 10 ditëshe ka nisur zyrtarisht në 28 maj, e si “parafushatë” më herët, madje edhe pa u shpallur dita e votimeve.
Në votimet e së dielës për deputetë të Kuvendit të Kosovës garojnë gjithsej 30 subjekte politike me 1.235 kandidatë, nga të gjitha komunitetet. Subjektet në garë janë 18 parti politike, 7 iniciativa qytetare, 4 koalicione dhe 1 kandidat i pavarur.

Lista përfundimtare e votuesve, e bazuar në Ekstraktin e Regjistrit Civil dhe miratuar nga KQZ, përmban 1.782.454 emra, të ndarë në 38 komuna përfshirë edhe veriun me shumicë serbe, mes tyre 33.735 votues të rinj, që do të votojnë për herë të parë.
Kryetarja e Komisionit Qendror të Zgjedhjeve, Valdete Daka, mes shumë punësh në sfidën e kohës së shkurtër vetëm një muaj për përgatitjet e zgjedhjeve të parakohshme parlamentare në Kosovë, në një intervistë ekskluzive të enjten për ATSH-në theksonte se “KQZ është e gatshme për të dielën e 8 qershorit, për të cilën fton të gjithë që të jetë ditë e votimit dhe e festës, e mesazhit më të mirë për demokracinë e pjekurinë e shtetit të perspektivës evropiane”.

“Rrjedhimisht, të gjitha aktivitetet e parashikuara tashmë janë përmbyllur dhe me besim them, se sa i përket anës së KQZ-së, jemi të gatshëm për Ditën e Zgjedhjeve”, u shpreh Daka.

Ndër aktivitetet e sotme të Komisionit Qendror të Zgjedhjeve është hapja e Qendrës Mediale në ambientet e Pallatit Rilindja, tani ndërtesë qeveritare, ku do mbahen edhe konferencat për shtyp për mediat e akredituara, mes të cilave është ATSH me korrespondentin në Kosovë.

KQZ ka akredituar rreth 30 mijë vëzhgues nga subjektet politike, organizatat joqeveritare, organizatat ndërkombëtare, përfaqësitë diplomatike, etj, ndërsa do të jenë rreth 100 vëzhgues nga Bashkimi Evropian.
“Presim që standardet evropiane për zgjedhje demokratike të respektohen plotësisht”, theksohet në deklaratën e përbashkët të Shefit të Zyrës së BE-së në Kosovë/ Përfaqësuesit Special të BE-së dhe Shefave të Misionit të shteteve anëtare të BE-së të pranishme në Kosovë, ku jepet edhe mesazhi se, “është shumë e rëndësishme që zgjedhjet në tërë Kosovën të mbahen në mënyrë të drejtë dhe transparente”.

Ambasadori Jean-Claude Schluberger në takim dje me Presidenten e Republikës, Atifete Jahjaga, theksoi se “misioni i OSBE-së në Kosovë ka bërë përgatitjet e nevojshme për të luajtur rolin mbështetës në zgjedhjet parlamentare të së dielës”.

Presidentja ka pasur takime të tjera, ku theksoi se këto zgjedhje duhet të jenë demokratike, të ndershme, të drejta dhe gjithëpërfshirëse. Ajo ka thënë se është me rëndësi që i gjithë procesi të jetë i sigurt, që vota e qytetarëve, në çdo pjesë të territorit të vendit, të jetë e garantuar dhe e paprekshme.

Misioni i BE-së për sundimin e ligjit ka njoftuar se masat e sigurisë për zgjedhjet parlamentare në Kosovë janë planifikuar dhe bashkërenduar me kujdes ndërmjet Policisë së Kosovës, EULEX-it, KFOR-it dhe OSBE-së për ta garantuar të drejtën e qytetarëve për të votuar, si dhe zhvillimin e qetë dhe të rregullt të procesit të votimit. Bashkëpunimi dhe bashkërendimi ndërmjet Policisë së Kosovës, EULEX-it, KFOR-it dhe OSBE-së vazhdon të jetë i shkëlqyer.

Kosova, 15 vjet e lirë nga qershori 1999 dhe e pavarur 6 vjet nga 17 shkurti 2008, në 8 qershor 2014 mban zgjedhjet parlamentare, të pestat në liri, të dytat në pavarësi.

Në Kosovën e lirë të parat zgjedhje parlamentare u mbajtën në 17 nëntor 2001. Legjislatura e Tretë ishte ajo që ka hyrë në histori me shpalljen e Pavarësisë. Në 8 qershor votohet për zgjedhjen e deputetëve të Kuvendit të Kosovës të Legjislaturës së Pestë.
Çdo qytetar legal i Kosovës, pa dallim feje, race, apo nacionaliteti, e që i ka mbushur 18 vjet ka të drejtën dhe mund të votojë në zgjedhjet e Kosovës.

Sipas regjistrimit të popullsisë të pranverës 2011, në Kosovë, pa veriun, u numëruan 1.739. 825 banorë rezidentë, 92.93 % shqiptarë. Pjesa tjetër e përqindjeve iu takon komuniteteve pakicë, 1.58% boshnjakë, 1.47 % serbë, 1.08 % turqë, etj.
Por, numri i banorëve-shtetasve të Kosovës është më i madh, meqë regjistrimi i popullsisë nuk ka përfshirë një të tretën e kosovarëve që vlerësohet se jetojnë e punojnë jashtë vendit.

Përqindja e komunitetit serb do ishte më e lartë me përfshirjen e veriut në regjistrim. Në veri të Mitrovicës dhe tre komuna të tjera veriore – Leposaviç, Zubin Potok e Zveçan, ku është refuzuar regjistrimi i popullsisë, sipas një shifre që e kanë përmendur autoritetet kosovare, jetojnë rreth 40 mijë serbë.

Republika e Kosovës është shtet i pavarur, sovran, demokratik, unik dhe i pandashëm”, përcaktohet në nenin 1 të Kushtetutës së miratuar në 9 prill nga Parlamenti i shtetit më të ri evropian, më pak se dy maj pas shpalljes së pavarësisë, e që ka hyrë në fuqi në 15 qershor 2008.

Sipërfaqja e përgjithshme e Republikës së Kosovës është 10,908 km². Republika e Kosovës deri tani është njohur nga 106 shtete anëtare të OKB-së.
Ditë më parë, në 27 maj të këtij viti, Presidentja Atifete Jahjaga në seancën e Këshillit të Sigurimit kërkoi njohjen edhe nga pesë vendet e BE-së dhe të gjitha vendet anëtare të OKB-së, që ende nuk e kanë njohur shtetin e ri, duke theksuar progresin, suksesin e përbashkët, bashkëpunimin dhe perspektivën evropiane edhe të gjithë rajonit.