Driant Zeneli: I ftoj të rinjtë që të mos kenë frikë nga dështimi (VIDEO)
Pothuajse 20 vite artisti Driant Zeneli, hulumton në fushën e artit vizual. Arti te Drianti lindi si një kuriozitet, duke imituar babain e tij deri sa ai pikturonte dhe më pas duke vazhduar me shkollim artistik në Itali. Sot për Portalb.mk, flet Drianti rreth karrierës së tij artistike.
I rrethuar me prind artdashës, babain piktor, mamanë muzikante, dëshira për të qenë një artist nisi shumë natyrshëm te Drianti. Karriera e tij artistike filloi pas akademisë së arteve në Itali, në momentin kur ai filloi t’i ekspozojë punimet e tij nëpër muze dhe galeri dhe duke marrë lëvdata dhe çmime të ndryshme.
Driant Zeneli lindi në Shkodër, ku aty kreu shkollën e ulët dhe të mesme. Më pas, vendosi të largohej nga vendlindja për të ndjekur studimet në Itali, ku atje qëndroi për 20 vite. Drianti është fitues i disa çmimeve ndërkombëtare si dhe prezantoi Shqipërinë në edicionin e 54-t të Bienales së Venecias.
“Kjo është një rrugëtim i gjatë, nuk mund të them që një ekspozitë mund të jetë më e rëndësishmja, secila plotëson rrugëtimin e gjatë. Sigurisht që sfida që kisha në Bienalet e Venedikut, kur përfaqësova Shqipërinë, përgjegjësia është më e madhe dhe sjell një përfitim të madh në ndërtimin e karrierës.” u shpreh Driant Zeneli.
Nëpër veprat e Driantit mund të shihet historia, raporti i njeriut me tokën, raporti i njeriut me njeriun dhe me kafshët. Ata të cilët duan të njihen drejtëpërdrejtë me veprat e Driantit, kanë mundësinë t’i shohin punimet e tij në Çifte Hamam e cila do të jet e hapur deri më 4 shtator.
“Trilogji: Nën një sipërfaqe ka një tjetër sipërfaqe” është ekspozita e artistit të njohur ndëkombëtarisht i cili për herë të parë vjen në vendin tonë. Kuratorja kryesore e projektit është Ana Frangovska. Në hapsirat e Çifte Hamamit gjeni “gërmimet” e jashtëzakonshme nën sipërfaqen e së kaluarës, të tashmes dhe së ardhmes sonë kolektive.
Mesazhi që Driant Zeneli përcolli për të gjithë artistët e rinj është:
“Unë besoj shumë në ëndrra dhe ëndrrat sigurisht kur kthehen në nevojë njeriu bën gjithçka për ta realizuar. I ftoj të rinjtë që të mos kenë frik nga dështimi, mos të kenë frik nga rrëzimi edhe most të ndalojnë edhe nëse dikush i paragjykon. Duhet të besosh në art, ashtu siç besimtarët besojnë që një ditë do të shkojnë në parajsë.” tha Zeneli.
Zeneli është duke e jetuar ëndrrën e çdo artisti dhe ai do të vazhdojë të jetë dinamik me shumë ekspozita brenda dhe jashtë vendit.
