Grkovska: Është i nevojshëm bashkëpunimi dhe koordinimi i ngushtë ndërmjet të gjitha projekteve të sigurisë kibernetike
Zëvendës-kryeministrja përgjegjëse për politika të qeverisjes së mirë, Sllavica Grkovska, sot organizoi një takim koordinues online ndërmjet Ministrit të Shoqërisë Informative dhe Administratës- Admirim Aliti dhe përfaqësuesve të Akademisë Estoneze për e-Qeverisje (e-GA) dhe USAID-it në Maqedoninë e Veriut. me qëllim të sigurimit të koordinimit dhe bashkëpunimit të ngushtë të projekteve në vend që fokusohen në sigurinë kibernetike, transmeton Portalb.mk.
Përveç ekipeve të e-GA dhe USAID, në takim morën pjesë edhe zëvendës-ministri për Shoqëri Informatike dhe Administratë Aleksandar Baidevski, si dhe përfaqësues nga Agjencia për komunikime elektronike.
Zëvendës-kryeministrja Grkovska theksoi se për Republikën e Maqedonisë së Veriut është jashtëzakonisht e rëndësishme që të gjitha projektet që realizohen në vend përmes partnerëve të huaj të jenë reciprokisht të koordinuara dhe plotësuese, në mënyrë që të mos ketë mbivendosje, por edhe të rritet efikasiteti i tyre.
Ajo theksoi se Akademia Estoneze për e-Qeverisje, me mbështetjen e Bashkimit Evropian, tashmë po fillon një projekt të ri për sigurinë kibernetike në vend, prandaj është e rëndësishme që ekipi e-GA të jetë në koordinim të vazhdueshëm me USAID-in, përfaqësues të cilët tashmë punojnë së bashku me Qeverinë e Maqedonisë për forcimin e mbrojtjes kibernetike nga disa aspekte.
Shefi i programit të sigurisë kibernetike në e-GA, Merle Maigre, theksoi se pasi e-GA, me mbështetjen e Bashkimit Evropian, bëri një analizë të situatës në vendet e rajonit të Ballkanit Perëndimor, projekti hyn në fazë të dytë, që nënkupton marrjen e aktiviteteve dhe masave specifike në Maqedoninë e Veriut. Kjo, theksoi Maigre, është shumë e rëndësishme duke pasur parasysh situatën e sigurisë me të cilën po përballemi aktualisht, pra sulmin e Rusisë ndaj Ukrainës.
Në këtë drejtim, ministri Admirim Aliti theksoi se bazuar në analizën e e-GA për gjendjen e sigurisë kibernetike në vendet e Ballkanit Perëndimor, Republika e Maqedonisë së Veriut tashmë është duke vepruar në aspektet kritike për ndërtimin e një sistemi eko të sigurt kibernetik.
Përfaqësuesi i USAID-it, Don Karmin, theksoi se koordinimi i rregullt me E-GA do të jetë i një rëndësie të madhe në realizimin e projekteve.
Projekti i USAID-it në fushën e sigurisë kibernetike fokusohet në disa aspekte kyçe, përkatësisht energjinë, bankat dhe financat, si dhe komunikimin dhe teknologjinë, por edhe në ndërtimin e elasticitetit digjital të sistemit.
Gjithashtu, përfaqësues të USAID-it vlerësuan se vëmendje duhet t’i kushtohet edhe forcimit të kapaciteteve të universiteteve dhe fakulteteve.
Zëvendëskryeministrja Grkovska vlerësoi se duhet të forcohet vetëdija për sigurinë kibernetike në të gjitha nivelet, duke përfshirë edhe zyrtarët dhe krerët e institucioneve shtetërore.
Në fund të takimit u ra dakord që të ketë takime të rregullta që do të mbahen një herë në muaj.
