Ish-kancelari gjerman Shreder në Moskë, takimi i mundshëm me Putinin

Kremlini njoftoi të martën se beson se ish-kancelari gjerman Gerhard Shreder është në Moskë dhe nuk përjashtoi kontaktin e mundshëm me të.

“Me sa dimë, ai është në Moskë,” u tha gazetarëve zëdhënësi i Kremlinit, Dmitry Peskov, kur u pyet nëse Kremlini ishte në dijeni të raporteve se Schroeder kishte udhëtuar në Moskë të martën, njofton Euractiv.

“Nuk ka asnjë takim të tillë, por nuk e përjashtojmë kontaktin e mundshëm”, shtoi Peskov.

Transmetuesi gjerman RTL vonë të hënën raportoi se Shreder ishte në Moskë. I pyetur nga RTL nëse do të takohej me presidentin rus Vladimir Putin, Shreder u citua të ketë thënë: “Jam me pushime këtu për disa ditë. Moska është një qytet i bukur.”

Zyra e Shrederit në Gjermani nuk iu përgjigj kërkesës për koment se pse Shreder kishte udhëtuar në Moskë.

Gazprom njoftoi të hënën se do të shkurtojë furnizimin me gaz në Gjermani përmes tubacionit Nord Stream 1 në vetëm 20% të kapacitetit nga e mërkura për shkak të një turbine që sipas saj duhej të ndalohej. Gjermania e hodhi poshtë këtë shpjegim.

Shreder ka qenë figurë kyçe në lidhjet energjetike midis dy vendeve, duke shërbyer si kancelar i Gjermanisë nga viti 1998 deri në 2005 përpara se të merrte një pozicion të diskutueshëm në bordin mbikëqyrës të kompanisë ruse të naftës Rosneft të kontrolluar nga shteti.

Sipas profilit të tij në LinkedIni, ai ende shërben si kryetar i komitetit të aksionerëve të Nord Stream ShA, operatori i gazsjellësit në pronësi të shumicës së Gazprom.

Nga refuzimi i ish-kancelarit për t’u distancuar nga Putini – duke përfshirë një takim ballë për ballë në Moskë në mars – partitë kryesore politike të Gjermanisë në maj ranë dakord t’i hiqnin atij të drejtën për zyrë të financuar nga shteti, duke mbyllur zyrën e financuar nga taksapaguesit.

Në të njëjtin muaj, Shreder refuzoi nominimin e Gazprom dhe u largua nga bordi i Rosneft.