Ilhan Kuçuk: Qeveria e re bullgare ka nisur një proces të mirë afrimi me Maqedoninë e Veriut
Qeveria e re në Sofje arriti të nisë një proces të mirë që ka për qëllim të afrojë Bullgarinë dhe Maqedoninë e Veriut, të shikojë perspektivën historike dhe në të njëjtën kohë të shikojë perspektivën në BE, transmeton Portalb.mk.
Kështu deklaroi Ilhan Kuçuk, bashkëkryetar i partisë liberale ALDE, eurodeputet nga DPS/“Ripërtëri Evropën” dhe raportues i përhershëm i Parlamentit Evropian për Maqedoninë e Veriut për televizionin bullgar Nova TV . Siç njoftoi korrespondenti i MIA-së nga Sofja, sipas Kuçukut ka tension në planin historik, por jo në atë politik. Ai tha se ka punuar me këta njerëz për shumë vite dhe tashmë ka besimin e tyre. Marrëveshja mes dy vendeve e vitit 2017, thotë ai, hapi rrugën euroatlantike për Maqedoninë e Veriut.
I pyetur nëse beson se Bullgaria duhet të heqë veton e saj për fillimin e bisedimeve të Maqedonisë me BE, ai tha se beson se Bullgaria duhet të punojë në mënyrë aktive brenda rregullave të dakorduara midis dy vendeve fqinje.
“Do të jetë një gabim i madh i politikës së jashtme bullgare nëse e lejojmë këtë luks – Shqipëria të fillojë procesin negociator, ndërsa Maqedonia e Veriut të lihet anash”, tha Ilhan Kuçuk.
Ndryshe, Maqedonia e Veriut dhe Bullgaria tensionuan raportet për shkak të kontesteve historike. Sofja zyrtare kërkon që Shkupi t’i pranojë kërkesat bullgare se gjuha maqedonase është normë e asaj bullgare dhe se kombi maqedonas është krijuar nga Tito.
Ky kontest ka bllokuar procesin eurointegrues të vendit, me çka Bullgaria këtë vit i vendosi dy herë veto Maqedonisë së Veriut, njëherë në qershor, kurse më pas më 14 dhjetor të vitit 2021, edhe një herë e bllokoi fillimin e negociatave RMV-BE.
Edhe në vitin 2020, njëjtë vendi fqinj, i vendosi dy here veto Maqedonisë së Veriut, një herë në këshillin e ministave të Jashtëm të BE-së si dhe në Këshillin për Punë të Përgjithshme të BE-së, duke penguar në këtë mënyrë miratimin e kornizës negociuese për fillimin e negociatave të vendit me BE-në. Për zgjidhjen e kontesteve të historisë, komisioni maqedono – bullgar ka mbajtur takime, po nuk kanë arritur të gjejnë zgjidhje. Palët kanë mosmarrëveshje më së shumti rreth identitetit të figurave historike të Mbretit Samoil dhe Goce Dellçevit.
