BE, rënie e numrit të vdekjeve nga ndotja e ajrit

Agjencia Evropiane për Ambient (EEA), tha se vdekjet e parakohshme, të shkaktuara nga ndotja e ajrit, kanë rënë, mirëpo ende besohet se ky shkaktar çon në më shumë se 300,000 vdekje në vit, shkruan REL, transmeton Portalb.mk.

Kjo Agjenci tha në raportin e publikuar më sot (15 nëntor) që nëse zbatohen udhëzimet e fundit për kualitet të ajrit të përpiluara nga Organizata Botërore e Shëndetësisë, numri i viktimave mund të përgjysmohet.

Më 2019 ishin regjistruar rreth 307,000 vdekje si pasojë e ajrit të ndotur, derisa më 2018, 346,000.

Ulja e numrit të viktimave në krahasim me vitin 2018 i është atribuuar përmirësimit të kualitetit të ajrit në kontinentin evropian.

Më 2019, Polonia ka regjistruar 39,300 vdekje, njëherësh shifrën më të lartë për kokë banori.

Sipas Agjencisë Evropiane për Ambient, në fillim të viteve 1990, copëzat tejet të vogla të ajrit – të cilat hyjnë thellë në mushkëri – kanë çuar në gati një milion vdekje të parakohshme në 27 vendet e Bashkimit Evropian.

Blloku evropian ka thënë se dëshiron të zvogëlojë numrin e vdekjeve si pasojë e ndotjes, për të paktën 55 për qind më 2030, në krahasim me shifrat e vitit 2005, kur ishin regjistruar 450,000 të tilla.

Nëse shifrat do të ulen me ritmin aktual, Agjencia ka vlerësuar se synimi do të arrihet më 2032.