BE-ja në përgatitje të sanksioneve shtesë kundër Bjellorusisë
Bashkimi Evropian ka shkuar një hap tutje në ndëshkim të Bjellorusisë për krizën në kufirin Poloni-Bjellorusi, ku qindra migrantë nga Lindja e Mesme, Afganistani dhe Afrika, vazhdojnë të qëndrojnë në ambiente të ftohta dhe me pak ushqim, njofton REL.
Ambasadorët e 27 vendeve të bllokut evropian janë pajtuar më 10 nëntor se situata lë hapësirë për sanksione të reja që mund të miratohen javën e ardhshme dhe të shënjestrojnë 30 individë dhe entitete, përfshirë ministrin e jashtëm të Bjellorusisë dhe linjën ajrore kombëtare.
Migrantët kanë kaluar një tjetër natë në kufi.
Liderët e BE-së kanë akuzuar Minskun se është duke i marrë ata nga vendet e varfra dhe me qëllim po i shtyn drejt kufirit me Poloninë, duke tentuar të shkaktojë kaos në BE.
Polonia është duke refuzuar që të lejojë hyrjen e migrantëve në territorin e saj dhe ka dërguar qindra trupa në kufi.
Ky shtet po ashtu ka ndërtuar një ndalesë me gjemba në zonën kufitare.
Presidenti i Këshillit Evropian, Charles Michel, ka thënë në një konferencë të përbashkët me kryeministrin polak, Mateusz Morawiecki më 10 nëntor se veprimet e Bjellorusisë përbëjnë “hakmarrje të heshtur”, për shkak se BE-ja ka kërkuar ndryshime demokratike në zgjedhjet e mbajtura në gusht të vitit 2020 në Bjellorusi.
Perëndimi dhe opizita bjelloruse i konsiderojnë të manipuluara zgjedhjet në të cilat Alyaksandr Lukashenka – që është në pushtet që nga viti 1994 – është shpallur fitues.
- LEXO: Përshkallëzohet kriza e emigrantëve në kufirin me Poloninë, do të mblidhet Këshilli i Sigurimit të OKB-së
- LEXO: Polonia arrestoi dhjetëra migrantë në kufi me Bjellorusinë
- LEXO: Kryeministri polak: Putini, organizator i krizës me migrantë
- LEXO: Përshkallëzohet kriza me refugjatët në kufirin polako-bjellorus
- LEXO: Polonia ka paralajmëruar eskalim të mundshëm të krizës me migrantët në kufirin me Bjellorusinë, Gjermania kërkon ndihmën e BE-së
