Kosova pa masa për t’u përballur me shtrenjtimin e rrymës

Pas 39 vjetësh punë në kompaninë metalurgjike “Ferronikeli”, Fehmi Nika për herë të parë në karrierën e tij si metalurg rrezikon të mbesë pa pagë.

Nika thotë për Radion Evropa e Lirë se ka mbetur pa shpresë dhe pa ide sesi do ta kalojë sezonin e dimrit pa të ardhura financiare.

Që nga 8 tetori, kompania “Ferronikeli”, që gjendet në Drenas, ka ndërprerë prodhimin duke i lënë të pasigurt rreth 2,000 punëtorë.

Ndërprerja u bë për shkak se kompania nuk mundi të përballojë vazhdimin e prodhimit për shkak të shtrenjtimit të energjisë elektrike në Evropë.

Punëtorët e kësaj kompanie u paguan me gjysmën e pagës për muajin tetor, ndërsa thonë se nuk kanë asnjë informacion nëse do të kthehen në punë.

Për disa ditë, gjatë tetorit, punëtorët e “Ferronikelit” protestuan duke kërkuar ndihmë nga Qeveria e Kosovës.

Kjo protestë u organizua nga Sindikata e Punëtorëve që udhëhiqet nga Fehmi Nika. Ai thotë se duhet të ndërmerren masa pasi punëtorët janë në gjendje të rëndë financiare.

“Punëtorët janë të pasigurt, për të ardhmen e vet nuk kanë kurrfarë sigurie, janë të zhytur në kredi”, thotë Nika.

“Ferronikeli”, që ka qenë kompani publike, u privatizua në vitin 2005, ndërkaq më 2018 u ble nga kompania nga Shqipëria “Balfin Group”.

Kjo kompani është ndër kompanitë e para brenda Kosovës që u prekën nga kriza energjetike në Evropë. Kjo për shkak se “Ferronikeli” e blen energjinë elektrike nga tregjet e jashtme ku rryma është shtrenjtuar shumë dhe nuk furnizohet fare brenda Kosovës.

Ekspertë të ekonomisë kishin deklaruar se ndalimi i prodhimit në këtë kompani do të ketë ndikim të drejtpërdrejtë në ekonominë e vendit, pasi kompania “Ferronikeli” është ndër eksportueset më të mëdha në Kosovë.

Pavarësisht insistimit të Radios Evropa e Lirë, nga kompania “Ferronikeli” nuk kanë komentuar lidhur me ndalesën e punës dhe ankesat e punëtorëve.

Qeveria e Kosovës po ashtu nuk ka deklaruar nëse do të marrë parasysh kërkesat e punëtorëve.

Një krizë energjetike, si pasojë e shtrenjtimit të madh të energjisë elektrike, e ka kapluar gjithë Evropën me nisjen e sezonit të ngrohjes në muajin tetor.

Momentalisht nëpër gjithë Evropën, faturat për energji janë shumë të larta për shkak të rritjes globale të konsumit të energjisë elektrike dhe gazit.

Përveç rritjes sezonale të kërkesës për energji elektrike që çon në ngritje të çmimeve, tani ato janë rritur për shkak të rezervave të vogla të magazinimit të gazit dhe çmimeve të larta për prodhim të energjisë nga qymyri në vendet e Bashkimit Evropian.

Deri në fund të tetorit, në Kosovë i gjithë prodhimi i energjisë elektrike është mbuluar brenda vendit dhe nuk ka pasur nevojë për import të energjisë elektrike.

Kështu, çmimi i rrymës në Kosovë nuk është prekur nga çmimi i rrymës në Evropë.