Projekti “Fuqizimi i të rinjve dhe gjenerimi i punësimit”, ofron kushte për të dy anët e kufirit
Oda ekonomike e Maqedonisë Veri-Perëndimore në partneritet me Fondacionin “Preda Plus” nga Prilepi, nisën me realizimin e projektit për bashkëpunim ndërkufitar ndërmjet Republikës së Maqedonisë dhe Republikës së Shqipërisë të titulluar: “Fuqizimi i të rinjve dhe gjenerimi i punësimit”.
Për këtë qëllim, në suazat e këtij projekti, në Dibër u mbajt punëtoria e parë me përfaqësuesit e ndryshëm dibranë nga institucionet e shumta ku punojnë dhe veprojnë. Sipas informacioneve të marra nga konsulentja seniore e projektit, Anduena Stephan, qëllimi i përgjithshëm i projektit është të promovohet partneriteti ndërmjet agjencive të ndryshme lokale qeveritare, institucioneve arsimore, organizatave rinore dhe sektorit privat në të dyja anët e kufirit, me qëllim të arritjes së kohezionit shoqëror te gjenerata e re përmes arsimit dhe punësimit. Sipas zonjës Stephan, qëllimet specifike të projektit janë ofrimi i mundësive për të rinjtë që të marrin pjesë në jetën ekonomike dhe sociale të të dyja rajoneve, duke e lehtësuar qasjen për të rinjtë në mjedisin e punës, të kuptuarit më të mirë të elementeve kyçe të aftësive për punësim dhe zhvillimin e shëndoshë të biznesit, si dhe platforma të përbashkëta ndërkufitare për përkushtimin reciprok për t’i ndihmuar të rinjtë.
Në punëtori pati edhe debate dhe diskutime të shumta rreth punësimit të të rinjve nga ty dyja anët e kufirit, ku janë të përfshirë universitetet dhe shkollat e mesme, si dhe zyrat për punësim të të dyja rajoneve. /Portalb