Serbët protestojnë ndaj tensionit kufitar – parim i reciprocitetit të qeverisë Kurti

Mosmarrëveshja në lidhje me targat e përkohshme për Serbinë, shpërthen në kalimin kufitar derisa Kosova lëviz për të zbatuar rregullin e taksës. Serbia nuk e njeh provincën e saj të mëparshme, tani Republika e Kosovës, si shtet të pavarur dhe sovran dhe e konsideron kufirin e ndërsjellë midis të dyjave vetëm si një kufi ‘administrativ’ dhe të përkohshëm.

Tensionet janë rritur në kufirin midis Kosovës dhe Serbisë atëherë kur Kosova ka vendosur policë shtesë për të zbatuar një rregull për heqjen e targave serbe nga makinat që hyjnë në Kosovë, ndërsa serbët protestuan për këtë veprim.

Policia speciale e Kosovës me automjete të blinduara u dërgua në kufi të hënën ndërsa qindra serbë të Kosovës thuhet se u nisën drejt kufirit me makinat dhe kamionët e tyre, duke bllokuar një rrugë që të çonte në një nga pikat e kalimit në shenjë proteste.

Policia e Serbisë ka vite që heq targat e regjistrimit nga makinat e regjistruara në Kosovë që hyjnë në Serbi dhe lëvizja e fundit e autoriteteve të Kosovës duket të jetë një lëvizje “tit-for-tat” (shpagim me të njejtën vlerë).

Zyrtarët e Kosovës thanë se që nga e hëna, targat e lëshuara në Serbi do të zëvendësohen me ato të përkohshme dhe se policia shtesë u vendos për të zbatuar aksionin e “reciprocitetit”.

Kryeministri i Kosovës, Albin Kurti tha se Serbia ishte e para që vendosi targa të përkohshme. Ai shtoi se lëvizja e Kosovës nuk e kufizon lirinë e lëvizjes dhe nuk është e drejtuar kundër serbëve.

Zëdhënësi i Komisionit Evropian, Peter Stano i bëri thirrje Kosovës dhe Serbisë që menjëherë, pa asnjë vonesë të përmbahen dhe të frenohen nga veprimet e njëanshme.

“Liria e lëvizjes është një nga themelet e Bashkimit Evropian dhe si të tillë ne presim që Kosova dhe Serbia të promovojnë lirinë e lëvizjes në rajon,” tha ai në Bruksel.

Të dy palët ranë dakord në bisedimet e ndërmjetësuara nga Bashkimi Evropian në vitin 2014 për të lejuar trafik falas. Sidoqoftë, zyrtarët e Kosovës thanë se marrëveshja ka skaduar dhe vetëm simbolet e duhura të Kosovës tani janë të vlefshme në territor.

Në Beograd, Presidenti serb, Aleksandar Vuçiç thirri një takim urgjent të martën të Këshillit Shtetëror të Sigurisë Kombëtare, ndërsa zyrtarët serbë në Kosovë kërkuan ndihmë nga Beogradi.

Zyrtari i lartë serb në Kosovë, Goran Rakic e përshkroi lëvizjen e fundit si një kërcënim të drejtpërdrejtë kundër serbëve që jetojnë në Kosovë, duke thënë se ata kanë informuar ndërmjetësuesin e BE-së, Miroslav Lajçak dhe zyrtarë të tjerë ndërkombëtarë për zhvillimet e reja.

Nuk duhet harruar se mijëra kosovarë u vranë dhe më shumë se një milion tjerë mbetën të pastrehë pas një goditjeje të përgjakshme të trupave serbe kundër popullit të Kosovës në periudhën e viteve 1998-1999, ku lufta përfundoi vetëm pas ndërhyrjes së NATO-s.

Shkruan: Amir Shabani