Ohri do të marrë 97 mijë euro nga buxheti për heqjen e ndërtimeve të paligjshme, sipas rekomandimeve të UNESCO-s
Komuna e Ohrit do të marrë gjashtë milion denarë ose 97 mijë euro nga buxheti i shtetit për të zbatuar rekomandimet nga UNESCO, për të zgjidhur problemin e ndërtimeve pa leje. Në seancën e fundit të 24-të të Qeverisë së RMV-së, u mor vendim për shpërndarjen e fondeve të parashikuara në nën-programin 30-Urbanizmi dhe ndërtimtaria, për grante kapitale në njësitë e vetëqeverisjes lokale nga buxheti i Ministrisë së transportit dhe lidhjeve për vitin 2020, njofton Portalb.mk.
Ato janë në vlerë prej 46.170.000 denarë (751 mijë euro) për realizimin e disa projekteve në të gjithë vendin. Këtu përfshihet përmbushja e rekomandimeve të UNESCO-s për trajtimin e ndërtimeve pa leje, për të cilat janë ndarë gjashtë milion denarë.
Aktualisht, në komunë është duke u zhvilluar një procedurë tenderimi për përgatitjen e dokumentacionit urban për plazhet, ndërsa kryetari i Komunës së Ohrit, Konstantin Georgieski, shpreson që kjo do të përfundojë deri në janar të vitit të ardhshëm.
“Në shkurt ose mars, do të shpallet një thirrje e re për marrjen me qira të plazheve me koncesion dhe e gjithë ajo situatë problematike me plazhet do të marrë fund përfundimisht. Është e nevojshme të bëhet një vlerësim strategjik, në përputhje me planin e menaxhimit, vlerësimin strategjik të ndikimit mjedisor të atyre objekteve, për të përcaktuar se cilat objekte do të hiqen, cilat pajisje mund e cilat nuk mund të përfshihen në Planet e ardhshme urbanistike”, tha kryetari i Ohrit.
Përndryshe, verës Komuna e Ohrit publikoi të dhëna se ka 1,076 ndërtime pa leje, nga të cilat 409 janë në zonën e mbrojtur. Pak ditë më vonë, kryetari i komunës së Ohrit Konstantin Georgievski tha se UNESCO nuk kërkon të prishë të gjitha ndërtimet e paligjshme, por të bëjë një vlerësim se si ato ndikojnë në zonën e mbrojtur dhe që sipas tij, një duzinë objekte do të duhet të shkatërrohen. Ai pastaj tha se komuna nuk mund të merret vetë dhe kërkoi ndihmë nga shteti.
