Iran, rritet në 6.541 numri i vdekjeve nga COVID-19
Numri i të vdekurve në Iran nga koronavirusi i ri (COVID-19) ka arritur në 6.541, pasi 55 viktima të tjera u raportuan gjatë 24 orëve të fundit, transmeton Anadolu Agency (AA).
Autoritetet shëndetësore të vendit njoftuan se gjatë 24 orëve të fundit po ashtu u testuan pozitiv 1.556 persona të tjerë, duke e çuar në 104.691 numrin e përgjithshëm të të infektuarve me koronavirus.
Mediat lokale raportojnë se zëdhënësi i Shëndetësisë, Kianoush Jahanpour, ka njoftuar se deri më tani nga koronavirusi janë shëruar 83.837 pacientë, pasi 2.711 pacientë të tjerë u lëshuan në shtëpi pasi u shëruan.
Jahanpour po ashtu tha se deri më tani në Iran janë kryer pothuajse 558.900 teste të dyshuara me COVID-19.
Në Iran, një nga vendet më të prekura nga pandemia në Lindjen e Mesme, për herë të parë COVID-19 u zbulua më 19 shkurt në qytetin Qom dhe më pas u përhap në të gjithë vendin.
Qeveria vendosi të mos imponojë një bllokim të plotë siç shihet në shumë vende të tjera, por mbylli institucionet arsimore dhe ndaloi mbledhjet kulturore, fetare dhe sportive.
Që nga 11 prilli, autoritetet në faza kanë lejuar rihapjen e bizneseve “me rrezik të ulët” të mbyllura si pjesë e masave për të përmirësuar përhapjen e virusit.
Presidenti iranian, Hassan Rouhani, të dielën e kaluar tha se vendi do të rihapë xhamitë në rrethe që shënuan një rënie të numrit të infeksioneve të koronavirusit që nga e hëna.
Mediat lokale raportuan se Rouhani po ashtu tha se kongregacionet e lutjeve të së premtes do të rinisin në 132 qytete dhe qytete të emërtuara “zona të bardha” ose “me rrezik të ulët”.
Rouhani tha se qeveria po ashtu planifikon të rihapë shkollat në zonat me rrezik të ulët që nga 16 maji.
Pasi për herë të parë u shfaq dhjetorin e kaluar në Wuhan të Kinës, koronavirusi është përhapur në mbarë botën, ndërsa Organizata Botërore e Shëndetësisë (OBSH) shpërthimin e ka shpallur pandemi globale.
Sipas të dhënave nga Universiteti “Johns Hopkins” me qendër në SHBA, në mbarë botën janë konfirmuar mbi 3.9 milionë raste COVID-19, prej të cilëve pothuajse 270 mijë kanë vdekur dhe rreth 1.3 milionë janë shëruar.
