Ekonomia greke pritet të tkurret nga 5 deri në 10 për qind
Greqia pret që ekonomia e saj, gjatë këtij viti do të tkurret nga 5 deri në 10 për qind, si rezultat i kufizimeve të vendosura, për të parandaluar përhapjen e koronavirusit të ri, shkruan REL.
“Duket se (ekonomia do të tkurret) në një interval ndërmjet 5 dhe 10 për qind”, tha ministri grek i Financave, Christos Staikouras, gjatë një adresimi televiziv, duke shtuar se vlerësimet mbi ekonominë po ndryshojnë vazhdimisht.
Greqia ka shtyrë deri më 4 maj masat izoluese dhe pritet që të lehtësojë masat ngadalë pas kësaj date.
Sipas të dhënave të Universitetit Johns Hopkins, në Greqi mbi 2,400 persona janë infektuar me sëmundjen COVID-19 që shkaktohet nga koronavirusi i ri dhe 130 kanë vdekur.
