Me leje të presidentit Armata e RMV-së do të angazhohet përballjen me gjendjen e krizës me virusin korona

Presidenti Stevo Pendarovski e pranoi propozimin e Qeverisë së RMV-së, që për shkak të parandalimit të përhapjes së koronavirusit COVID-19, një pjese të pjesëtarëve të Armatës së Republikës së Maqedonisë së Veriut të angazhohen në përballjen me gjendjen e krizës në territorin e Dibës dhe kufirit me Shqipërinë, njofton Portalb.mk.

Siç bëri të ditur shërbimi i presidentit Pendarovski, Armata do t’u ndihmojë forcave policore shtetërore dhe autoritetve lokale në kryerjen e detyrimeve pasi në këto vende u shpall gjendja e jashtëzakonshme.

Vendimi hyri në fuqi sonte dhe do të zgjasë deri më 11 prill 2020.

Një ndër vendimet e seancës së 18 qeveritare është që Shtabi i Krizës pranë Qendrës për Menaxhim me Kriza menjëherë të fillojë me hartimin e planit veprues për parandalim dhe ballafaqim me gjendjen e krijuar në zonat e komunave, me rishikim të plotë të resurseve të disponueshme njerëzore dhe materialeve teknike dhe plan të veprimit koordinues në zonat e krizës.

Qeveria i angazhoi ministritë të Shëndetësisë, të Punëve të Jashtme, të Transportit dhe Lidhjeve, të Punëve të Jashtme, Armatën e Republikës së Maqedonisë së Veriut, Qendrën për Menaxhim me Kriza dhe Drejtorinë për Mbrojtje dhe Shpëtim me të gjitha institucionet e tjera t’i vendosin në dispozicion të gjitha kapacitetet dhe resurset e disponueshme të cilat mund të vihen në funksion, si dhe të nominojnë anëtarë të Shtabit të Krizës pranë Qendrës për Menaxhim me Kriza.

Inspektorati Shtetëror i Punës dhe Agjencia e Barnave dhe Pajisjeve Mjekësore – MALMED janë të angazhuara të kryejnë mbikëqyrje të koordinuara të jashtëzakonshme inspektuese të të gjithë operatorëve ekonomikë të cilët shesin pajisje për mbrojtje nga koronavirusi, konform masave, rekomandimeve dhe udhëzimeve të Qeverisë.

Ministria e Punëve të Brendshme duhet të caktojë një person i cili do të jetë përgjegjës në rast të nevojës për intervenim gjatë kryerjes së këtyre mbikëqyrjeve të jashtëzakonshme inspektuese nga ana e inspektorateve.

Dënimet do të vlejnë për personat fizikë dhe subjektet juridike.

• LEXO: Filipçe: Katër raste të reja me virus korona – gjithsej 13, gjendje krize në Dibër dhe Qendër Zhupë

Inspektorati shtetëror i punës dhe Inspektorati shtetëror i tregut do të inspektojnë vazhdimisht në teren me ndihmën e policisë, duke pasur edhe kompetenca që të procedojnë raste deri në Prokurori, me qëllim realizimin e rekomandimeve të Qeverisë.

Në rajonin e Pollogut, Inspektorati i punës tashmë në bashkëpunim me policinë e SPB Tetovë ka paralajmëruar kontroll në lidhje me respektimin e orarit të punës në objekte hotelerike, kazino dhe bastoret.

“U bëhet apel pronarëve të objekteve hotelerike, kafeterive, bareve, restoranteve, klubeve, kazinove dhe bastoreve detyrimisht ta respektojnë orarin e punës deri në orën 18. Respektimi i këtij vendimi qeveritar do të kontrollohet në koordinim me Inspektoratin Shtetëror të Punës dhe menjëherë do të ndërmerren sanksione të parapara me ligj”, deklarojnë nga policia.

Ministri i Shëndetësisë, Venko Filipçe, në konferencën për shtyp të orës 14:45 në lidhje me gjendjen në vend me virusin korona, njoftoi se ka 4 raste të infektuar të rinj, me çka numri shkon në 13. Qeveria ka shpallur gjendje krize në disa vende të vendit, gjegjësisht në komunat Dibër dhe Qendër Zhupë, njofton Portalb.mk.

Sot, presidenti Stevo Pendarovski njoftoi se tashmë ka caktuar takim të Këshillit të Sigurimit për ditën e hënë në ora 16:00, ku përveç anëtarëve standardë do të jetë i pranishëm edhe Ministri i Shëndetësisë dhe shefi i Shtabit të Përgjithshëm.

Siç tha ai, në mbledhje do të diskutohet gjendja në vend me virusin korona si dhe të gjitha masat që  duhet të përgatiten në rast të përshkallëzimit të gjendjes.

Pendarovski gjithashtu njoftoi se shërbimet e Presidencës kanë detektuar grupe të organizuara për shpërndarjen e lajmeve të rreme.

Qeveria e Maqedonisë së Veriut, në seancën e djeshme qeveritare ka marrë vendim që të ndalohet hyrja në Maqedoninë e  Veriut, e shtetasve nga Kina, Irani, Italia, Koreja e Jugut, Franca, Gjermania dhe Spanja, të cilat në listën e Organizatës Botërore të Shëndetësisë janë shtet me rrezik të lartë nga virusi korona.

Hyrja në shtet vetëm atyre të cilët do të dorëzojnë vërtetim nga organi kompetent për karantinën e zbatuar.

“Në rast të paraqitjes së udhëtarëve në pikat kufitare të Maqedonisë së Veriut nga vendet me rrezik të lartë dhe të mesëm, sipas listës së OBSh-së, të njëjtët patjetër duhet të vetëizolohen”, vendosi Qeveria.

Ndalesa është edhe për organizimin e transportues ndërkombëtar me autobus, furgon, minibus apo ngjashëm, ndaj vendet me nivel të lartë të rrezikut, por edhe ata në drejtim të shtetit tonë.

Rikujtojmë se vazhdojnë të jenë në fuqi masat për parandalimin e infektimit apo shpërndarjes të virusit vdekjeprurës korona (KOVID 19).

Dyqanet, kafiteritë dhe restorantet punojnë deri në ora 18:00, janë anuluar ngjarjet sportive, kulturore apo zbavitëse.

• LEXO: RMV, dënime nga inspektorati në lidhje me mosrespektimin e rekomandimeve të Qeverisë për virusin korona
• LEXO: RMV-ja me masa të përforcuara kundër përhapjes së koronavirusit
• LEXO: Koronavirusi, NTP prej nesër me orar të reduktuar të autobusëve
• LEXO: Ndiqni këto rekomandime për parandalim të virusit korona (FOTO)
• LEXO: Virusi korona, këto vende nuk duhet t’i vizitoni (Infografik)