Albani dhe Miriami u bënë prindër për herë të dytë, erdhi në jetë Duam
Alban Skënderaj dhe Miriam Cani janë bërë prindër për herë të dytë. Lajmin e ka ndarë me ndjekësit në Instagram vetë Albani pak minuta më parë. Në një shkrim të gjatë ai ka rrëfyer emrin e veçantë të vogëlushit dhe pse ata kanë zgjedhur ta quajnë pikërisht ashtu. Përkrah një fotoje, ku shfaqet dora dhe një pjesë e fytyrës së vogëlushit, Albani ka shkruar:
“Mirë se erdhe në jetë Duam.
Ne do të duam deri sa frymë më të mos kemi. Ashtu si e do natyra diellin e si e duan yjet qiellin. Gjithmonë më shumë se dje e më pak se nesër. Ndoshta nuk të falim dot një kurorë, por ti do jesh përjetësisht princi ynë Duam. Do bëjmë gjithçka që është në dorën tonë që ti të rritesh me shëndet, që ti të rritesh me dinjitet. Të përqafosh të mirën dhe të luftosh padrejtësitë. Të jesh tolerant, i duruar, por i guximshëm dhe i vendosur kur duhet. Të dish nga ke ardhur dhe ku do të shkosh. Të jesh vetvetja dhe gjithmonë krenar për veten. Të duash e të të duan.
Është detyrim moral ndaj jush që na keni dhuruar dashuri e keni qenë pjesë e gëzimeve dhe hidhërimeve tona të ndajmë arsyen pse zgjodhëm këtë emër, edhe pse mund ta imagjinoni.
Duam (përveçse një fjalë e ëmbël, e pastër dhe kuptimplot shqipe) vjen nga emri i këngës me të cilën ne kurorëzuam martesën tonë para pak muajsh, ditë e cila përkon me momentin e paharrueshëm kur zbuluam që Duam-i kishte nisur rrugën e tij për të ardhur në jetë. Ishim duke xhiruar klipin dhe duke e kënduar çdo ditë atë këngë ndaj e kemi ndjerë gjithmonë shumë edhe si këngën e tij. DU-AM-ELI, edhe inicialet e emrave tanë si prindër janë aty në mes si një shtyllë ku Duam-i dhe motra e tij Ameli mund të mbështeten gjithmonë.
Mirë se vjen në familje biri ynë.
Të DUAM.”
