Njegosh, nxënësit do të mësojnë në gjuhën shqipe

Nxënësit shqiptarë të shkollës fillore Njegosh, më nuk do ta ndjekin procesin arsimor në gjuhën maqedonase, por në gjuhën shqipe. Ministri i Arsimit dhe Shkencës, Arbër Ademi sot shkoi në komunën e Gazi Babës ku zhvilloi takim me kryetarin e Komunës dhe drejtorin e shkollës, njofton TV 21.

“Sot me kryetarin e komunës, me drejtorin e shkollës gjithashtu edhe me banorët lokal, diskutuam për çështjen e formimit të paraleleve në klasën e gjashtë për të vazhduar me mësim edhe në gjuhën shqipe. Seriozisht e shqyrtuam kërkesën e qytetarëve dhe u morën obligime konkrete si nga drejtori i shkollës ashtu edhe nga kryetari i komunës. Të nesërmen do të duhet të dërgohet një kërkesë e tillë nga shkolla deri tek kryetari i komunës. Sigurish që gjatë këtij viti dhe këto procedura që ne po flasim dhe për të cilën u shpreh gatishmëri dhe vullnet do të duhet të përfundojnë brenda kësaj jave tërësisht”, u shpreh ministri i Arsimit dhe Shkencës, Arbër Ademi.

Para dy dite 13 nxënësit e shkollës fillore Njegosh në Jurumleri, bojkotuan mësimin për shkak të mos pasjes paralele shqipe nga klasa e pestë deri në të nëntën. Nesër të gjithë prindërit tek komuna do të bëjnë kërkesë që pastaj brenda një jave nxënësve shqiptarë të mund të ju jepet e drejta kushtetuese që të mësojnë në gjuhën e tyre amtare.