Gripi këtë vit është më agresiv, prandaj shkakton komplikime dhe vdekje

Epidemiologët presin që të ketë raste më të vështira të gripit të derrit, i cili shkakton komplikime të rënda. Profesoresha Gordana Kuzmanovska nga Instituti i Shëndetit Publik tha se këtë sezon janë pasqyruar ndryshime të shpeshta dhe mutacione të këtij virusi, transmeton Portalb.mk.  

“Ata janë shumë të shpeshta te virusi i influencës dhe për atë këtë vit kemi rritje të virusit më agresiv, i cili shkakton komplikime serioze, por edhe vdekje”, tha Kuzmanovska.

Epidemiologët paralajmërojnë se gripi nuk duhet të kuptohet si jo serioz. Ata rikujtojnë se mbrojtja më e mirë kundër tij është vaksinimi.

Ndryshe, sa i përket gjendjes së fruthit, javën e kaluar janë regjistruar 104 raste të reja. Epidemia është në rrjedhë, ka rritje të numrit të sëmurëve, ndërsa këtë javë ka arritur numri më i madh deri tani. Nga Instituti për Shëndet Publik thonë se sezoni i fruthit dhe i gripit do të vazhdojnë edhe disa javë.

Nga fillimi i epidemisë në Shkup në dhjetor të vitit të kaluar, në nivel shtetëror janë regjistruar gjithsej 659 raste me fruth, nga të cilët 522 janë paraqitur në Shkup. Nga fillimi i epidemisë, numri i përgjithshëm i personave të vaksinuar deri në moshën 14-vjeçare, që kanë marrë vaksinën me dozën e parë dhe të dytë arrin në 11.052 fëmijë.

Në pjesën tjetër të shtetit, nga fillimi i epidemisë, numri i përgjithshëm i personave të vaksinuar deri në moshën 14-vjeçare me dozën e parë dhe të dytë, përfshin 6.200 fëmijë.

Numri i përgjithshëm i personave të vaksinuar të moshës deri në moshën 14-vjeçare me vaksinën MRP nga fillimi i epidemisë në gjithë shtetin arrin 17.252.