Assange: Obama ta ndalojë gjuetinë e shtrigave ndaj Wikileaks

Themeluesi i Wikileaks, Julian Assange theu heshtjen disa-javore duke dalë para mediave. Ai i kërkoi Shteteve të Bashkuara të Amerikës dhe vecanërisht presidentit Barack Obama të ndalë atë që ai e quajti “gjueti shtrigash” ndaj faqes së tij. 

“Nuk po kërcënohet apo vendoset nën presion vetëm Wikileaks, por vetë liria e shprehjes dhe shëndeti i gjithë shoqërisë tonë”, tha australiani para mediave të grumbulluara para ambasadës ekuadoriane në Londër ku është i strehuar prej muajit qershor.

Gjuetia e shtrigave nga ana e Shteteve të Bashkuara duhet të marrë fund, vijoi Assange, duke bërë thirrje më pas për lirimin e ish-ushtarit Bradley Manning i arrestuar nga autoritetet amerikane si i dyshuari kryesor për rrjedhjen e informacionit diplomatik top sekret. 

Mendohet se Manning, që mbahet në burg prej vitit të kaluar, pasi ka fituar aksesin në qindra-mijëra faqe të dokumenteve sekrete të diplomacisë amerikane, ia ka dorëzuar ato Assange. Ky i fundit i publikoi më pas nëpërmjet faqes Wikileaks.

Publikimi shkaktoi jo pak stres për Departamentin e Shtetit. Në dosjet e publikuara diplomatët amerikanë në mbarë botën, dorëzonin raportimet e tyre në Uashington për udhëheqësit e vendeve ku shërbenin. Në këto raportime nuk mungonin epitetet sikletosëse, sic ishte ai për Silvio Berlusconi-n apo Vladimir Putin. 

Assange fitoi azilin politik nga Ekuadori, por cështja duket se do të shndërrohet në një incident diplomatik jo vetëm mes Britanisë së Madhe dhe vendit amerikano-latin, por mund të përfshijë edhe Shtetet e Bashkuara dhe Suedinë. Kjo e fundit kërkon ekstradimin e australianit për ta vendosur para drejtësisë për akuzën e përdhunimit të ngritur kundër tij.

Ndërkohë, Londra është e vendosur për të mos lejuar udhëtimin e Assange drejt Ekuadorit dhe mban të rrethuar nën masa të forta sigurie ambasadën ekuadoriane dhe nga ana tjetër është shprehur se dëshiron një “zgjidhje miqësore” për cështjen në fjalë.