Osmani: Për 3 vite siguruam 12.5 milion euro për Gostivarin
Përcaktimi i rejtingut kreditor nga ana e Agjencisë Moody’s ishte momenti kryesor që hapi rrugën për marrje te kredive dhe donacioneve nga bota e jashtme për komunën e Gostivarit.
Kështu u shpreh kryetari i kësaj komune Rufi Osmani para gazetarëve duke prezantuar punën e Zyrës për zhvillim ekonomik lokal që punon në kuadër të Komunës së Gostivarit.
“Reformat mundësuan që në fazën e parë të realizohen kreditë në vlerë prej 1.2 milion euro, të fitohet e drejta e aplikimit për kredi të re prej 5 milion euro, së fundi u fitua e drejta për marrjen e një donacioni prej 2,3 milion franga nga SECO, Zvicerane. Këto fonde financiare do të zgjidhin përfundimisht problemin me ujin e pijshëm në Gostivar” tha Osmani.
Këto fonde janë realizuar direkt nga komuna e Gostivarit dhe NP “Komunalec” në sfera të ndryshme: ujësjellës dhe kanalizime, trafik rrugor, sipërfaqe publike, ndriçim publik, sigurim të pajisjeve për NP komunale dhe arsim.
“Vlera e projekteve të realizuara nga fondet e jashtme është mbi 1,2 milion euro. Projekte të miratuara dhe që janë në fazë prokurimi kapin shumën mbi 2,7 milion euro. Projekte te miratuara qe presin fazën e prokurimit janë 2,3 milion euro. Zyra e ZHEL-it në komunë dhe në Komunalec ka përgatitur projekte dhe ka parashtruar aplikacionet në institucione ndërkombëtare për projekte me vlerë prej 6,615 milion euro me garanci maksimale se këto fonde do i miratohen komunës tonë në fazën e ardhshme”, nënvizoi Osmani.
Numri një i Gostivarit, potencoi se në periudhën kohore 3 vjeçare, komuna e Gostivarit ka arritur të sigurojë fonde financiare në vlerë të përgjithshme prej 12.5 milion euro nga institucione te ndryshme ndërkombëtare.
“Këto fonde financiare janë siguruar nga: Banka Botërore shuma 1,8 milion euro, EBRD banka 2,1 milion euro; KfË banka 6,3 milion euro; SECO – Zvicër 2,1 milion; TIKA e Turqisë 350 mijë euro, SDC e Zvicrës 150 mijë euro dhe pjesa tjetër nga më tepër institucione të huaja”tha ai. /portalb/