BE do të vendosë masa mbrojtëse të përkohshme ndaj SHBA-ve

Komisioni Evropian (KE) ka bërë të ditur se Bashkimi Evropian (BE) do të zbatojë masa të përkohshme mbrojtëse mbi çelikun pas tarifave të paralajmëruara nga SHBA-të, transmeton Anadolu Agency (AA).

“Komisioni dje paraqiti synimin e tij për shtetet anëtare për të vendosur masa mbrojtëse të përkohshme për çelikun në formën e një Kuote të Vlerës Tarifore (TRQ)”, tha KE në një deklaratë.

KE tha se masat e reja do të hyjnë në fuqi pasi të miratohen zyrtarisht nga Komisioni në muajin korrik.

“Miratimi i masave mbrojtëse ishte pjesë e reagimit të trefishtë të BE-së ndaj vendimit të njëanshëm të SHBA-ve për të imponuar tarifa për çelikun dhe aluminin”, theksohet në deklaratë.

SHBA njoftoi se duke filluar nga 1 qershori i vitit 2018 do të vendosë detyrime shtesë prej 25 për qind dhe 10 për qind, respektivisht në importet e çelikut dhe aluminit nga BE-ja.

Sipas KE-së, masat e SHBA-ve ndikojnë në eksportet e BE-së me një vlerë prej 6.4 miliardë euro (7.4 miliardë dollarë) dhe nga kjo shumë BE-ja do të ribalancojë menjëherë eksportet prej 2.8 miiliardë euro (3.2 miliardë dollarë).